ԵՐԵՎԱՆ, 12 հուլիսի – Sputnik. Քաղաքագետ Ստյոպա Սաֆարյանը ավտովթարի է ենթարկվել։ Այս մասին հայտնում է SHAMSHYAN.com-ը։
Ըստ տեղեկությունների՝ այսօր՝ հուլիսի 21-ին, ժամը 13։30-ի սահմաններում Ս. Սաֆարյանը իր վարած Lexus մակնիշի 07 RX 907 համարանիշի ավտոմեքենայով Տավուշի մարզի Ծաղկավան գյուղի վարչական շրջանում դեռևս անհայտ պայմաններում դուրս է եկել երթևեկելի գոտուց և կողաշրջվել։
Բարեբախտաբար, տուժածներ չկան։
Ոստիկանությունը պարզում է՝ արդյո՞ք Ս. Սաֆարյանը ավտոմեքենայում ուղևորներ ունեցել է, թե ոչ։
Քիչ առաջ Սաֆարյանն իր Facebook–յան էջում գրառում է կատարել։
«Սիրելի ընկերներ, ինչպես արդեն տեղյակ եք ԶԼՄ-ներից, այսօր Տավուշի մարզում իմ ավտոմեքենայով վթարի ենթարկվեցինք (ավտոմեքենայի աջ անվադողերը մի փոքր դուրս եկան կողնակ, որտեղի խիճն ու փոսը անկառավարելի դարձրին մեքենան): Մեքենայում գտնվողներից ոչ մեկը որևէ կերպ կամ չափով չի տուժել»,-գրել է քաղաքագետը։
Սաֆարյանը զարմանքով նշել է, որ ոչ ոք անգամ քերծվածք չունի։
«Որքան էլ զարմանալի լինի, ոչ մի խազ չկա որևէ մեկի վրա, ինչի համար շնորհակալ եմ Աստծուն և ճակատագրին»,–գրել է Սաֆարյանը։
Քաղաքագետը շնորհակալություն է հայտնել բոլորին ուշադրության, անհանգստության ու մաղթանքների համար՝ նշելով, որ իրենք ողջ և անվնաս շարունակում են նշել Վարդավառը։
Վթար Տավուշում. շրջանավարտին տեղափոխող ավտոմեքենան գյուղի ճանապարհին կողաշրջվել է