ԵՐԵՎԱՆ, 17 հուլիսի — Sputnik. Վեթինգը ՀՀ վարչապետ Նիկոլ Փաշինյանի հայտարարած առաջնահերթությունն էր, և իշխանությունը պետք է ամեն ինչ աներ, որ նախագիծը պատրաստվեր, ներկայացվեր։ Այսօր ԱՄՆ Գերագույն դատարանի շենքի դիմացից Facebook-ի ուղիղ եթերում հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանն` անդրադառնալով Հայաստանում ընթացող իրավական գործընթացներին ու դրանց շուրջ Վենետիկի հանձնաժողովի ներկայացրած տեսակետներին։
«Ես կարծում եմ, որ տվյալ պարագայում հանրապետականները հերոսացվում են Վենետիկի հանձնաժողովի վերջին եզրակացության համատեքստում, թե` այ, ինչ հզոր են հանրապետականները, որ ազդում են Վենետիկի հանձնաժողովի վրա։ Դա ուղղակի աբսուրդ է»,– ասաց Մարուքյանը։
Նրա խոսքով` նման հեղինակավոր կառույցներն ազդեցությունից դուրս են։
«Չափանիշները եկեք պահպանենք, մարդու իրավունքները, իրավունքի գերակայությունը հարգենք, և որևէ միջազգային կառույց չի կարող մեզ հետ կապված որևէ մտահոգություն արտահայտել։ Ընդհակառակը` մենք կստանանք տոտալ աջակցություն»,– ասաց նա։
Անդրադառնալով ՀՀ դատական համակարգին` Մարուքյանն ընդգծեց, որ այդ համակարգի մաքրումն անհրաժեշտություն է։
«Երբ Հայաստանում դատական իշխանության հետ կապված որոշակի գործողություններ են տեղի ունեցել, օրինակ` մուտքերի արգելափակում, այլ պրոցեսներ, մենք դրա մասին բարձրաձայնել ենք, և այն, ինչ չի համապատասխանում իրավունքի չափանիշներին, ասել ենք, որ սա սխալ է։ Հետևաբար, ինչ եմ ուզում ասել, երբ մենք չափանիշները չենք պահպանում և սխալներ ենք թույլ տալիս, ոչ մի հանրապետական, ոչ մի կուսակցություն չի ազդում Վենետիկի հանձնաժողովի վրա։ Մենք սխալ ենք անում, այդ կառույցն արձանագրում է մեր սխալը։ Վերջին գործողությունները եղել են մտահոգիչ, հանձնաժողովն ասել է, որ այդ գործողությունները մտահոգիչ են»,– նշեց Մարուքյանը։
Խոսելով վեթինգի մասին` նա հարցադրում արեց, թե ինչպե՞ս եղավ, որ նույն Վերնետիկի հանձնաժողովը Ալբանիայում աջակցել է, «դիզայն է արել ամբողջ վեթինգը», իսկ Հայաստանում վեթինգն անթույլատրելի է համարում։
Պատճառը, ըստ Մարուքյանի, այն է, որ Հայաստանում ամեն մեկն իր գործով չի զբաղվում, վեթինգի մասին մեկնաբանություններ են տալիս մարդիկ, որոնք իրավունքի հետ ոչ մի կապ չունեն։
«Եվ այս մարդկանց դիլետանտական մեկնաբանությունները բերեցին նրան, որ մենք ունեցանք այդ եզրակացությունը»,– ասաց Մարուքյանը` հավելելով, որ եթե արդեն հայտարարվել է, թե առանձին մարմին չի ստեղծվում, ուրեմն դա արդեն վեթինգ չէ, և պետք չէ ասել, որ մենք վեթինգ ենք անում։
Սահմանադրական դատարանի հարցում Մարուքյանը հայտարարեց, որ իրենց դիրքորոշումը համընկնում է Վենետիկի հանձնաժողովի արտահայտած դիրքորոշման հետ։
Հիշեցնենք` մամուլում հունիսի 15-ից ակտիվ քննարկման թեմա դարձավ Վենետիկի հանձնաժողովի լիագումար նստաշրջանի ամփոփող փաստաթղթում Հայաստանի դատական համակարգին վերաբերող որոշ դրվագներ։
Փաստաթղթում, մասնավորապես նշվում էր, որ Հայաստանի իշխանությունների հրավերով Հայաստան ժամանած ԵԽ բարձրաստիճան պատվիրակությունն այցի ընթացքում քննարկել է դատաիրավական բարեփոխումները և համաձայնության եկել, որ «բոլոր պաշտոնավարող դատավորների ընդհանուր վեթինգը ո՛չ անհրաժեշտ, ո՛չ էլ օգտակար կլինի»:
Նշենք, որ ս.թ. մայիսի 19–ի ուշ երեկոյան Նիկոլ Փաշինյանը ժողովրդին կոչ արեց մայիսի 20–ի վաղ առավոտից փակել հանրապետության բոլոր դատարանների մուտքերը։ Իսկ կեսօրին հանդես եկավ հայտարարությամբ, որտեղ նշեց, որ Հայաստանում հեղափոխությունը պետք է իր ավարտին հասնի` դատական համակարգի բարեփոխմամբ։ Որպես բարեփոխման ուղի վարչապետը հայտարարեց, որ բոլոր դատավորների նկատմամբ պետք է վեթինգ իրականացվի։