ԵՐԵՎԱՆ, 8 հուլիսի — Sputnik. Պետական եկամուտների կոմիտեի մոտ ցույց անողները ՊԵԿ նախագահի տեղակալ Շուշանիկ Ներսիսյանի հետ հանդիպումից հետո բացեցին շենքի մուտքը։
Այսօր առավոտյան մետաղի ջարդոնով բեռնված երկու ավտոմեքենա փակել էին Պետեկամուտների կոմիտեի մուտքը։ Արտահանողները բողոքում են պետտուրքի մասին օրենքում փոփոխությունների նախագծից, որով մետաղական ջարդոնի արտահանման համար պետտուրք է սահմանվում։ «Հարկային օրենսգրքի» փոփոխությունների փաթեթում ներառված «Պետտուրքի մասին փոփոխություններ և լրացումներ կատարելու մասին օրենքի» նախագծով մետաղի թափոնների արտահանման համար պետտուրք սահմանելու օրենքի նախագիծը դեռ Ազգային ժողովում է, և այն չի հաստատվել։
«Կապ» ընկերության ներկայացուցիչ Արմեն Այվազյանը Sputnik Արմենիայի հետ զրույցում հայտնեց, որ ըստ Ներսիսյանի` ջարդոնի արտահանման հարցի ուսումնասիրությունն ավարտվել է, և բոլոր ընկերությունները, որոնք ունեն ծագման սերտիֆիկատ, շաբաթվա ընթացքում հերթով կստանան ջարդոնն արտահանելու թույլտվություն։
«Հույս ունենք, որ նրանք կպահեն խոստումը, և հարցը կլուծվի։ Այլապես մենք պատրաստ ենք պաշտպանել մեր իրավունքները բոլոր օրինական ուղիներով», – ընդգծեց նա։
Պետտուրքի մասին օրենքում փոփոխությունների նախագծով նախատեսվում է 1 տոննա արտահանվող մետաղի համար 80.000 դրամ պետտուրք սահմանել։
Հիշեցնենք` հունիսի 20-ին, մետաղական թափոնների արտահանմամբ զբաղվող մի շարք ընկերության ներկայացուցիչներ մետաղյա ջարդոններով բեռնված բեռնատարներով բողոքի ակցիա էին անում կառավարության մոտ, այնուհետև ՊԵԿ շենքի մոտ։ Նրանք հայտարարել էին, որ պետտուրք սահմանելը կհանգեցնի ընկերության սնանկացման։
Sputnik Արմենիան մեկնաբանության համար դիմել էր ՊԵԿ դեռ հունիսի 20–ին, երբ տնտեսվարողները բողոքի ակցիա էին անում`հայտարարելով, որ չնայած ԱԺ–ն պետտուրքի մասին օրենքը չի ընդունել, բայց ՊԵԿ–ն արդեն իրենց թույլ չի տալիս արտահանմամբ զբաղվել։ ՊԵԿ–ի լրատվական ծառայությունից մեզ հայտնել էին, որ գրավոր հարցում ուղարկենք, ինչն էլ արել էինք` հետաքրքրվելով, թե ի՞նչն է պատճառը, որ ձգձգվում է մետաղի ջարդոնի արտահանումը։ Ի պատասխան մեր հարցմանը ՊԵԿ–ից հայտնել էին, որ սահմանին մետաղական ջարդոնի արտահանման հետ կապված խնդիրները (ապրանքի բացթողման ձգձգումը) կարող է պայմանավորված լինել ոչ թե նոր օրենսդրական փոփոխություններով, այլ համապատասխան փաստաթղթային ստուգման կամ այլ ձևով մաքսային հսկողության իրականացման անհրաժեշտությամբ։