ԵՐԵՎԱՆ, 8 հուլիսի — Sputnik. Մի շարք քաղաքացիներ այսօր աղբով լի տոպրակների պարունակությունն ամբողջությամբ թափեցին Երևանի քաղաքապետարանի մուտքի դիմաց` ի նշան աղբահանության խնդրի հետ կապված բողոքի։
Բողոքի ակցիայի մասնակիցներից մեկն էլ «Երկիր ծիրանի» խմբակցության անդամ Սոնա Աղեկյանն էր, որի խոսքով` իրենք ամեն օր մի տարածքից աղբը մաքրելու են ու տանելու են քաղաքապետարանի դիմաց թափելու։
«Այսօրվա աղբն Արշակունյաց պողոտայից ենք հավաքել ու այդպես շարունակելու ենք»,–ասաց նա։
Նշենք, որ բողոքի ակցիայի մասնակիցներից ոմանց բերման ենթարկեցին, նրանց թվում էր նաև Աղեկյանը։
Ոստիկանության մամուլի ծառայությունից Sputnik Արմենիային հայտնեցին, որ 8 անձ է բերման ենթարկվել։
«Նրանք բերման են ենթարկվել խուլիգանություն կատարելու համար։ Նախապատրաստվում են նյութեր»,–հայտնեցին ոստիկանությունից։
Երևանի քաղաքապետի մամուլի խոսնակ Հակոբ Կարապետյանն էլ Facebook սոցիալական կայքի իր էջում գրել է, որ Սոնա Աղեկյանը մի քանի հոգու հետ «բուրավետ» պերֆորմանս է արել քաղաքապետարանի դիմաց։
«Չգիտեմ, թե որքանով են քաղաքացիները ճիշտ հասցե ընտրել իրենց բողոքի համար, քանի որ հայտնի է, որ մինչ օրս «Սանիթեք» ընկերությունն է ըստ պայմանագրի համարվում աղբահանության օպերատորը։ Առկա անբավարար վիճակը ստեղծվել է տարիների ընթացքում, և պատճառները բազմապիսի են։ Այնուհանդերձ, ևս մեկ անգամ հայցում ենք համաքաղաքացիների ներողամտությունը ստեղծված անհարմարության համար և խնդրում ենք զինվել համբերությամբ։ Աղբի խնդրի լուծումը շատ մոտ է»,–գրել է նա։
Կարապետյանը հայտնում է նաև, որ աղբահանության նորաստեղծ համայնքային հիմնարկը կոչված է ապահովել քաղաքի մաքրությունը հիմնական օպերատորի անկարողության դեպքում, և հիմնարկը հիմա համալրվում է անհրաժեշտ մարդկային և տեխնիկական ռեսուրսով։ Նրա խոսքով` մոտ օրերս Երևան կհասնի նոր աղբարկղերի խոշոր խմբաքանակ, իսկ մի քանի շաբաթից կժամանի աղբատար մեքենաների մի մասը, որը զգալիորեն կթեթևացնի աղբահանության հարցը։
Հիշեցնենք, որ ընդհանուր առմամբ գնվել է աղբահավաք 24 մեքենա. ևս 10-ի գնումը ընթացքի մեջ է։