ԵՐԵՎԱՆ, 4 հուլիսի — Sputnik. Վարչապետի հրամանով ՊԵԿ փոխնախագահ նշանակված Էդվարդ Հովհաննիսյանը արդարադատության նախարար Ռուստամ Բադասյանի ընկերն է։ Այս մասին հայտնում է «Հրապարակ» օրաթերթը` հավելելով, որ նա ՊԵԿ–ում փոխարինելու է Բադասյանին ու ղեկավարելու այդ կառույցի իրավական բլոկը։
«Հովհաննիսյանը, ի տարբերություն շատ նորաթուխ պաշտոնյաների, փորձ ունի, ՊԵԿ-ի ստորին օղակներից աճած կադր է, շարքային տեսուչից հասել էր մինչև ՊԵԿ հետաքննության և օպերատիվ հետախուզության վարչության պետի պաշտոնին:
Ասում են՝ հենց Բադասյանն է բարեխոսել իր ընկերոջ համար»,– գրում է թերթը։
«Հրապարակն» այդ հարցով դիմել է Էդվարդ Հովհաննիսյանին, որը չի հերքել նախարարի հետ իր ընկերական հարաբերութունների ու նաև իր համար նրա բարեխոսելու մասին լուրերը։
«Ես չեմ թաքցնում Ռուստամ Բադասյանի հետ իմ ունեցած մտերիմ հարաբերությունները, մենք աշխատանքային գործընկերներ ենք եղել, իսկ դերակատարության մասով, գուցե պարոն Բադասյանն իր կարծիքը հայտնել է, չեմ բացառում»,-թերթի փոխանցմամբ ասել է ՊԵԿ նորանշանակ փոխնախագահը։