Հարուցված քրեական գործերից պարզ է դառնում, որ կազմվել են անտառային ֆոնդի պահաբաժինների ընդունման-հանձնման կեղծ արձանագրություններ, ապօրինի ծառահատումները թաքցնելու նպատակով չեն արձանագրվել հատված ծառերի կոճղերը:
Անտառտնտեսության մասնագետի փոխանցմամբ՝ Հայաստանի անտառների վերջին հաշվառումը կատարվել է 1993-ին, երբ զանգվածային ապօրինի հատումները դեռ չէին սկսվել:
«Ապօրինի ծառահատումները կարող են շատ հարստությունների ոչնչացման պատճառ դառնալ: Հայաստանն, օրինակ, ընկուզենու 602 գենետիկական ձև է ունեցել, դրանց մի մասն արդեն ոչնչացել է»,- ցավով նշում է Ռուբեն Պետրոսյանը:
2019 թվականի մարտի 18-29-ն ընկած ժամանակահատվածում իրականացված մոնիթորինգի արդյունքում «Հայանտառ» ՊՈԱԿ-ի ինը ստորաբաժանումներում արձանագրվել է 199 ապօրինի ծառահատման դեպք: