ԵՐԵՎԱՆ, 1 հուլիսի– Sputnik. Հուլիս ամիսը տեղումնառատ և համեմատաբար զով կլինի։ Այս մասին Facebook-ի իր էջում գրել է ՀՀ ԱԻՆ «Հիդրոմետ» ծառայության պետ Գագիկ Սուրենյանը։
«Այս տարվա հուլիսին հանրապետության տարածքի եղանակակալիմայական պայմանների ձևավորման վրա իրենց հիմնական ազդեցությունն են թողնելու Սև ծովից ներթափանցող խոնավ և սառը օդային հոսանքները, ինչով պայմանավորված հուլիս ամսին միջին ամսական ջերմաստիճանը հանրապետության ողջ տարածքում կանխատեսվում է 1 աստիճանով նորմայից ցածր, իսկ տեղումների քանակը նորմայից ավելի։ Սա նշանակում է, որ ունենալու ենք համեմատաբար զով և տեղումնառատ հուլիս»,–գրել է Սուրենյանը։
Նա տեղեկացրել է, նաև, որ հանրապետության ամենաշոգ վայրերում` Արարատյան դաշտ, Սյունիքի հովիտներ, Երևան, ամսվա ընթացքում ընդամենը 2-3 օր օդի ջերմաստիճանը կարող է բարձրանալ ընդամենը +37․․․+38 աստիճան։
«Հիդրոմետ» ծառայության պետը նաև տեղեկացրել է, որ անցած տարի այս օրերին Երևանում +40․․․+42 աստիճան էր, իսկ այսօր ընդամենը +28։