ԵՐԵՎԱՆ, 29 հունիսի — Sputnik. ՀՀ Ազգային ժողովի փոխխոսնակ Ալեն Սիմոնյանը մի շարք հարցերի պատասխաններ է իմացել` շփվելով ռոբոտի հետ։ Սիմոնյանը Facebook սոցիալական կայքի իր էջում մի տեսանյութ է հրապարակել, որում երևում է, թե ինչ հարցեր է ուղղել ռոբոտին։
«Շփվեցինք ռոբոտի հետ, ինձ Красавчик էր ասում»,- տեսանյութին կից գրել է Սիմոնյանը:
Պատգամավորը հետաքրքրվում է, թե քանի տարեկան է ռոբոտը, ինչին ի պատասխան ռոբոտն ասում է, որ ինքը շատ երիտասարդ է և նոր-նոր սկսում է կյանքը:
Հարցին, թե որքա՞ն են ապրում մարդիկ, ռոբոտը հետաքրքիր ու հումորային պատասխան է տալիս. «Մարդիկ, կարծես, չեն բողոքում»:
Սիմոնյանը հետաքրքրվում է` ի՞նչ է ցանկանում կինը։ Ռոբոտը պատասխանում է. «Սիրունիկ, գիտնականները վերջապես պարզել են` ինչ է ցանկանում կինը, բայց կանայք արդեն մտափոխվել են»:
Ի դեպ, Հայաստանի ԱԺ փոխխոսնակ Ալեն Սիմոնյանն աշխատանքային այցով է Մոսկվայում։ Նա մեկնել է Միջխորհրդարանական հանձնաժողովի 31-րդ նիստի աշխատանքներին մասնակցելու: