ԵՐԵՎԱՆ, 24 հունիսի — Sputnik. Մեկ մարդու իշխանությունն այլևս տապալված է: Այս մասին Faceook-ի իր էջում գրել է Թուրքիայում ընդդիմադիր քրդամետ «Ժողովուրդների դեմոկրատական կուսակցության» (ԺԴԿ-HDP) հայ պատգամավոր Կարո Փայլանը`անդրադառնալով Ստամբուլի քաղաքապետի ընտրությունների արդյունքներին:
«Այս գիշեր բոլորս միասին շուրջպար կբռնենք: Վաղը բոլորս ի գործ՝ միասնաբար կառուցելու ժողովրդավարություն»։
Ըստ նրա` այս անգամ ընտրողները, մանավանդ HDP-ական ընտրողները, ավելի վճռաբար տրամադրված են գնացել ընտրության։ Եվ այս ընտրության ամենադրական արդյունքն այն է, որ Թուրքիայում արդեն խարխլվել են մեկ մարդու իշխանության հիմքերը:
Հիշեցնենք, որ հունիսի 23–ին Ստամբուլի քաղաքապետի ընտրություններում հաղթել է Թուրքիայի ընդդիմադիր Ժողովրդահանրապետական կուսակցության թեկնածու Էքրեմ Իմամօղլուն՝ ստանալով քվեների 54%-ը: Նրա գլխավոր մրցակիցը՝ իշխող «Արդարություն և զարգացում» կուսակցության թեկնածու, երկրի նախկին վարչապետ Բինալի Յըլդըրըմը, ընդունել է իր պարտությունը: Երկրի նախագահ Ռեջեփ Թայիփ Էրդողանը շնորհավորել է նոր քաղաքապետին:Ինչ վերաբերում է հաղթած թեկնածուին, ապա նա հայտարարել է, որ սրանով թե՛ Ստամբուլի, թե՛ Թուրքիայի համար «նոր փուլ» է սկսվում: