ԵՐԵՎԱՆ, 19 հունիս — Sputnik. Պատերազմը երբեք չի ավարտվել և այն ցանկացած պահի կարող է բռնկվել։
Այս մասին կրկին հայտարարել է ՀՀ վարչապետ Նիկոլ Փաշինյանը՝ Ազգային ժողովում Կառավարության հետ հարցուպատասխանի ժամանակ պատասխանելով պատգամավոր Արման Բաբաջանյանի՝ ղարաբաղյան հարցի կարգավորման վերաբերյալ հարցին:
Նա շեշտել է, որ Ադրբեջանը ցանկանում է կիրառել նույն գործիքը, որը երկար ժամանակ կիրառում էր. «Այսինքն՝ փորձ անել Ղարաբաղի հարցի կարգավորումը դուրս բերել կառուցողական բանակցային հունից»,- մեկնաբանել է վարչապետը՝ հավելելով, որ Հայաստանը պետք է դիմակայի սրան՝ նաև Զինված ուժերի պատրաստականության մակարդակը բարձրացնելով:
«Հայաստանն ու Արցախը պատերազմ չեն ուզում, բայց պատերազմի սպառնալիքով որևէ մեկը չի կարող Արցախի և Հայաստանի Հանրապետություններին վախեցնել»,- արձանագրել է Նիկոլ Փաշինյանը։
Նա նաև շեշտել է, որ կրկին օրակարգում է հրադադարի ռեժիմի խախտման մեխանիզմի անհրաժեշտության հարցը և հայկական կողմի դիրքորոշումն այս հարցի շուրջ շարունակում է մնալ նույնը: