ԵՐԵՎԱՆ, 19 հունիսի — Sputnik. Միխայիլ Խաչատուրյանի սպանության մեջ մեղադրվող Խաչատուրյան քույրերի փաստաբանները բողոք են ներկայացրել Ռուսաստանի քննչական կոմիտեի ղեկավար Ալեքսանդր Բաստրիկինին։ Նրանք կտրականապես համաձայն չեն աղջիկների գործողությունների որակավորման հետ։ Փաստաբանների հայտարարությունը հրապարակվել է Facebook–ում «Վերդիկտ» մոսկովյան փաստաբանների կոլեգիայի էջում։
Միխայիլ Խաչատուրյանի աղմկահարույց սպանությունը տեղի էր ունեցել Մոսկվայում 2018 թվականի հուլիսի 27-ին։ 57-ամյա տղամարդու դիակը` վզի և կրծքավանդակի բազմաթիվ կտրած–ծակած վերքերով, հայտնաբերվել էր Մոսկվայի Ալտուֆևսկի մայրուղում գտնվող տան շքամուտքում։ Երեք դուստրերը խոստովանել են, որ իրենք են սպանել հորը։
Անցած ուրբաթ քննչական մարմինը Խաչատուրյան քույրերի նկատմամբ առաջադրել է բոլոր հնարավոր որակավորումներից ամենածանրը` նախնական համաձայնությամբ խմբակային սպանություն: Աղջիկներին 8-20 տարվա ազատազրկում է սպառնում։
Քույրերի փաստաբանները պնդում են, որ քույրերն իրենց գործողությունները կատարել են՝ ելնելով Միխայիլ Խաչատուրյանի կողմից տարիներ շարունակ կիրառվող բռնությունից ինքնապաշտպանվելու անհրաժեշտությունից։
Փաստաբանների խոսքով` ոչ ոք չի վիճարկում այն փաստը, որ աղջիկներն ապրել են այնպիսի պայմաններում, երբ նրանցից յուրաքանչյուրը մշտապես սեփական կյանքի և քույրերի կյանքի սպառնալիք է զգացել. նրանք վստահ են եղել, որ անհնար է արտաքին օգնություն ստանալ, ինչը իրավիճակն անելանելի է դարձրել։
«Մենք կարծում ենք, որ Մարիան, Անգելինան և Քրիստինա Խաչատուրյանը եղել են անհրաժեշտ պաշտպանության իրավիճակում, և նրանց նկատմամբ քրեական հետապնդումը պետք է դադարեցվի», – նշված է փաստաբանների հայտարարությունում, որոնք միասնական դիրքորոշում ունեն այս գործում։
Իրավաբանների խոսքով` քննչական մարմինն անփոփոխ է թողել աղջիկների գործողությունների որակավորումը, թեև հետաքննության ընթացքում սահմանվել է, որ «նրանք ապրել են բազմամյա հոգետրավմատիկ իրավիճակի պայմաններում», – նշվում է փաստաբանների հայտարարությունում։
Անգելինա Խաչատուրյանի պաշտպանը` Ալեքսեյ Պարշինը, հայտարարել է, որ փորձագետներն անցկացրել են ավելի քան 20 դատական փորձաքննություն, որոնց անալիզը ցույց է տալիս, որ աղջիկների հայրը բազմիցս սեռական ոտնձգություններ է կատարել նրանց հանդեպ։
«Իբրև հիմնական վարկած՝ քննությունը պետք է դիտարկի ինքնապաշտպանության անհրաժեշտությունը, իսկ Միխայիլ Խաչատուրյանի դեմ հետմահու պետք է քրեական գործ հարուցել», – նշել է իրավաբանը։
Ավագ քրոջ՝ Քրիստինայի փաստաբան Ալեքսեյ Լիպցերը նշել է, որ իր պաշտպանյալը փաստացի մասնակից չի եղել հանցագործության կատարմանը, և դա օբյեկտիվորեն հաստատվել է: Բայց քննությունը կատարված հանցագործությանը Քրիստինայի մասնակից չլինելու հանգամանքին պատշաճ գնահատական չի տվել:
Խաչատուրյան քույրերի փաստաբանները հայտարարել են, որ իրենց պաշտպանյալները դաժան բռնության և ցինիկ անպատժելիության զոհ են, և չեն կարող ենթարկվել պատասխանատվության նախնական պայմանավորվածությամբ սպանություն կատարելու մեղադրանքով։