ԵՐԵՎԱՆ, 17 հունիսի — Sputnik. Իր գործունեությամբ Տիգրան Պետրոսյանն իրավիճակ փոխեց Հայաստանում։ Այս մասին այսօր Տիգրան Պետրոսյանի շախմատի տանը նման կարծիք հայտնեց Հայաստանի երրորդ նախագահ, Հայաստանի շախմատի ֆեդերացիայի նախագահ Սերժ Սարգսյանը` խոսելով շախմատի աշխարհի չեմպիոն Տիգրան Պետրոսյանի մասին։
Նշենք, որ այսօր լրանում է Տիգրան Պետրոսյանի ծննդյան 90-ամյակը, որը նշվեց Շախմատի տանը։ Այսօր նաև Տիգրան Պետրոսյանի «Գահերի խաղը. ինչպես հաղթել շախմատում» գրքի հայերեն թարգմանության շնորհանդեսն էր այնտեղ։
«Գաղտնիք չէ, որ հայ ժողովուրդն իր պատմության ընթացքում ծնել է բազմաթիվ շնորհաշատ զավակներ, որոնք իրենց լուրջ ներդրումն են ունեցել մեր ժողովրդի զարգացման գործում: Նրանցից մեկը Տիգրան Պետրոսյանն էր, որը մյուսներից տարբերվեց նրանով, որ իր տաղանդի դրսևորմամբ իրավիճակ փոխեց Հայաստանում»,–ասաց Սերժ Սարգսյանը։
Նրա խոսքով` Պետրոսյանը, սկզբնական շրջանում լինելով միակ հայ գրոսմայստերը, նրա շնորհիվ ընդամենը մի քանի տասնամյակ հետո այսօր Հայաստանում շախմատի ֆեդերացիան միավորում է 43 գրոսմայստերի: Սարգսյանի կարծիքով` նրանք, ովքեր տանը շախմատ են խաղում, կյանքին վերաբերվում են մի քիչ այլ կերպ, քան նրանք, ովքեր շախմատ չեն խաղում:
«Այս համեստ միջոցառումը մեկ այլ խորհուրդ էլ ունի. մեր ժողովուրդը մշտապես տեսել է աշխարհում առաջավորը, որն ընկալելով ու տեղայնացնելով` սեփական երանգներն է հաղորդել ու շնորհիվ դրա է, որ մենք հարատևում ենք այս չափազանց բարդ տարածաշրջանում։ Մեր հարատևելու գործընթացն առաջ է ընթացել նաև թարգմանիչների օգնությամբ, ինչպես նաև նրանց օգնությամբ, որոնք գիտելիքը տարածել են գրքի միջոցով»,–ասաց նա։
Անդրադառնալով Տիգրան Պետրոսյանի «Գահերի խաղը. ինչպես հաղթել շախմատում» գրքին` Սարգսյանը նշեց, որ այն նվեր է հանրությանը։
Տիգրան Պետրոսյանի մականունն էր «Երկաթե Տիգրան»՝ իր գրեթե անխորտակելի պաշտպանության համար։ ԽՍՀՄ հավաքականի կազմում նա 9 անգամ հաղթել է շախմատի օլիմպիադաներում։
«Ընդհանրապես կարծում եմ, որ շախմատում ամեն ինչ կախված է տակտիկայից: Եթե ոմանք խաղի ստրատեգիան նմանեցնում են մարմարե սյունի, ապա տակտիկան այն քանդակն է, որի վրա քանդակագործը երկար ժամանակ աշխատում է և արվեստի գլուխգործոց ստեղծում»,–նման կարծիք ուներ Պետրոսյանը շախմատի մասին։
Տիգրան Պետրոսյանը մահացել է Մոսկվայում 1984թ. օգոստոսի 13-ին։