ԵՐԵՎԱՆ, 15 հունիսի - Sputnik. Երևանի կենտրոնում դանակահարված Սարգիս Ավագյանի սպանության գործով հետախուզվող, 1989թ.-ին ծնված տղամարդը հայտնաբերվել է։ Այս մասին տեղեկացնում է ՀՀ քննչական կոմիտեն:
Հունիսի 10-ին Գլինկայի և Տիգրան Մեծ փողոցների խաչմերուկում Երևան քաղաքի բնակիչ, տաքսու վարորդ Սարգիս Ավագյանի և Երևան քաղաքի՝ 1963 և 1989 թթ. ծնված բնակիչների միջև տեղի էր ունեցել վիճաբանություն, որի ժամանակ Ավագյանը ստացել էր կյանքի հետ անհամատեղելի մարմնական վնասվածքներ, իսկ վիճաբանությանը միջամտած 24-ամյա երիտասարդը՝ միջին ծանրության մարմնական վնասվածք:
Իրավապահ մարմինների իրականացրած հետախուզական միջոցառումների արդյունքում պարզվել են միջադեպի մի շարք հանգամանքներ, ինչպես նաև՝ ենթադրյալ հանցագործություն կատարած անձանց ինքնությունը:
Նախնական տվյալներով` դեպքի օրը ենթադրյալ հանցագործություն կատարած անձինք նստել են Սարգիս Ավագյանի վարած տաքսին, ավտոմեքենայի սրահում վիճաբանել նրա հետ, որից հետո վիճաբանությունը շարունակվել է մեքենայից դուրս՝ մայթեզրին, այնուհետև վերածվել ծեծկռտուքի:
Ծեծկռտուքի ընթացքում 1989թ. ծնված երիտասարդն իր մոտ գտնված սուր կտրող-ծակող առարկայով հարվածել է Սարգիս Ավագյանի կրծքավանդակին, այնուհետև նույն անձը հարվածներ է հասցրել նաև վիճաբանությանը միջամտած 1995թ. ծնված երիտասարդի որովայնին և դիմել փախուստի: Հայտարարված հետախուզման արդյունքում նա հայտնաբերվել է:
Նշենք, որ ավելի վաղ «Ժողովուրդ» օրաթերթը, անդրադառնալով Սարգիս Ավագյանի սպանությանը, նշել էր, որ նա «Մարտի 1-ի գործով» տուժող Արթուր Ավագյանի հայրն էր՝ հավելելով, որ ըստ լուրերի` Սարգիս Ավագյանին դանակահարել են Զորիկ Մանուկյանն ու Գրիգոր Բողջողջյանը: Վերջինս 1993 թվականին 10 տարի ժամկետով ազատազրկման էր դատապարտվել սպանության մեղադրանքով: Թերթը նաև տեղեկություն էր հրապարակել այն մասին, որ ըստ իրենց հասած լուրերի` իրավապահները միջադեպի տարածքի բոլոր տեսախցիկները առգրավել են, տեսագրություններից երևում է, որ Սարգիս Ավագյանին դանակահարած անձինք չեն օգտվել տաքսի ծառայությունից:
1989թ. ծնված երիտասարդը (ենթադրվում է՝ Զորիկ Մանուկյանը) հայտնաբերված է, նախաքննությունը շարունակվում է: