ԵՐԵՎԱՆ, 12 Հունիս — Sputnik. Այսօր` հունիսի 12-ին, ողբերգական ավտովթար է տեղի ունեցել Կոտայքի մարզում. վթարի հետևանքով հղի կին է մահացել։ Այս մասին գրում է shamhsyan.com–ը։
«Ժամը 13։00-ի սահմանում Volkswagen Vento մակնիշի ավտոմեքենայի վարորդը Երևան-Սևան ավտոճանապարհի 25 կմ հատվածում՝ Չայնիի ոլորանների սկզբնամասում, դեպի Սևան ընթանալիս դուրս է եկել ճանապարհի երթևեկելի գոտուց և բախվել բետոնե արգելապատնեշին։ Այնուհետև առաջ ընթանալով՝ բախվել բետոնե պարսպին և մասամբ հայտնվել ճանապարհի մեջտեղում։ Վթարի հետևանքով վարորդն ու 2 ուղևորները, որոնցից մեկը հղի կին է, տեղափոխվել են «Աբովյան» բժշկական կենտրոն»,–հայտնում է կայքը։
Դեպքի վայրում հավաքվածներն ասել են, որ վիրավորները վարորդի կինն ու մայրն են։
Մինչ դեպքի վայրում աշխատել են քննիչները, հիվանդանոցից ահազանգ է ստացվել, որ հղի կինը մահացել է։