ԵՐԵՎԱՆ, 8 հունիսի — Sputnik. Գլենդելի քաղաքային խորհրդի անդամ Զարեհ Սինանյանը հրաժարվել է պաշտոնից, որպեսզի բարձր պաշտոն զբաղեցնի Հայաստանի Հանրապետության կառավարությունում։ Այս մասին գրում է «Ասպարեզը»։
Թեև Հայաստանի կառավարությունը պաշտոնական հայտարարություն չի արել, բայց ենթադրվում է, որ Սինայանը ստանձնելու է Սփյուռքի գլխավոր հանձնակատարի պաշտոնը։
Գլենդելի քաղաքապետ Արա Նաջարյանը շնորհակալություն է հայտնել Սինանյանին Գլենդելին մատուցած ծառայությունների համար։ Տեղական օրենքների համաձայն` քաղաքային խորհրդի նոր անդամ կնշանակվի 1 ամսվա ընթացքում, հակառակ դեպքում 4 ամսվա ընթացքում նոր ընտրություն կկազմակերպվի։
Սինանյանն առաջին անգամ 2013-ին է ընտրվել Գլենդելի քաղաքապետական խորհրդի անդամ և վերընտրվել 2017-ին։ Նա երկու անգամ ստանձնել է քաղաքապետի պաշտոնը՝ 2014-2015-ին և 2018-2019-ին:
Սինանյանը նաև Հոլիվուդ-Բըրբանք օդանավակայանի տնօրինության նախագահն է:
Հիշեցնենք` «Կառավարության կառուցվածքի և գործունեության մասին» ՀՀ օրենքում կատարված փոփոխությունների արդյունքում Սփյուռքի նախարարությունը միացվել է վարչապետի աշխատակազմին՝ վերաձևակերպվելով Սփյուռքի գործերի գլխավոր հանձնակատարի գրասենյակի։