ԵՐԵՎԱՆ, 8 հունիսի – Sputnik. Եվրո 2020-ի ընտրական փուլում այսօր կայացած Հայաստան–Լիխտեյնշտեյն հանդիպումից հետո, երբ մեր հավաքականը հաղթեց 3։0 հաշվով, ֆուտբոլիստները սկսեցին պտտվել խաղադաշտում ու շնորհակալություն հայտնել երկրպագուներին, այդ պահին մի պատանի նետվեց դաշտ` դեպի Հենրիխ Մխիթարյանը։
Կարգադրիչները հենց դաշտի սկզբում թույլ չտվեցին, որ նա հասնի ֆուտբոլիստին։ Թևերը ոլորեցին և ուզում էին դաշտից հեռացնել նրան, բայց Հենրիխ Մխիթարյանը մոտեցավ, խնդրեց, որ տղային բաց թողնեն։
Երկրպագուն փաթաթվեց Հենրիխին, նրանք միասին սելֆի արեցին, հետո ֆուտբոլիստը խնդրեց կարգադրիչներին, որ թույլ տան` տղան հանգիստ հեռանա դաշտից։
Այդ ժամանակ խաղադաշտի մեկ այլ հատվածում ֆուտբոլիստ Գևորգ Ղազարյանը մոտեցավ հաշմանդամ մի երիտասարդի, իր մարզաշապիկը տվեց նրան ու նկարվեց հետը։
Նշենք, որ Հայաստանի ազգային հավաքականը Լիխտեյնշտեյնի ընտրանու դեմ խաղում հաղթանակի հասավ Գևորգ Ղազարյանի, Ալեքսանդր Կարապետյանի և Տիգրան Բարսեղյանի գոլերի շնորհիվ։