ԵՐԵՎԱՆ, 4 հունիսի – Sputnik. Մեր տեղեկություններով՝ երեկ Աշտարակ քաղաքում դիմակավորված ոստիկանները հենց Աշտարակում ապրող երեք երիտասարդի են բռնել ու բերման ենթարկել ոստիկանություն։
Ըստ մեզ հասած տեղեկությունների՝ նրանք կասկածվում են ավազակային հարձակում կատարելու մեջ։ Բերման ենթարկված երիտասարդներից մեկը տաքսու վարորդ է։
Հունիսի 2-ին նրա մեքենան է նստել երիտասարդ մի աղջիկ (Չեխիայի քաղաքացի)։ Մեքենայում եղել է նաև վարորդի ընկերներից մեկը։ Օտարերկրացի ուղևորուհին պատվիրել է իրեն Աշտարակից տանել Երևան։ Ճանապարհին տաքսու վարորդն ու նրա հետի երիտասարդը դանակ են հանել, ուղևորուհուն սպառնացել և թալանել նրան։
Զբոսաշրջիկի իրերը վերցնելուց հետո նրան իջեցրել են մեքենայից ու հեռացել։
Զբոսաշրջիկն էլ դիմել էր ոստիկանություն ու պատմել կատարվածի մասին։