Ոստիկանության հատուկ նշանակության վարչության ծառայողը երեխայի կյանք է փրկել։ Այս մասին հայտնում է ՀՀ ոստիկանության մամուլի ծառայությունը` ոստիկանի ու երեխայի պատմությունը ներկայացնելով տեսանյութով։
Ոստիկանության հատուկ նշանակության վարչության աշխատակից, ավագ լեյտենանտ Վարդան Ֆիդանյանը մայիսի 26-ին կնոջ և աղջկա հետ եղել է Երևանի զբոսայգիներից մեկում, որտեղ լիճ կա։ Երեխաները խաղացել են, մարդիկ` զբոսնել, երբ հանկարծ ճիչեր են լսվել։ Երեխա է ընկել լիճը։
Ոստիկանը նկատել է` ինչպես է երեխան ընկնում ջուրը, վազել ու ցատկել է ջուրը, երեխային հանել ու մոտեցրել ափին։
8 տարեկան Վարդանի հարազատները որոշել են իրենց փոքրիկին փրկած Վարդանին կնքահայր դարձնել։
Այս դեպքից հետո փոքրիկի տատը, որը կյանքի ընթացքում շատ դժվարություններ է տեսել, ասում է, որ մարդկանց հանդեպ հավատը մեծացել է։ Վարդանի հարազատներն ուզում են, որ ոստիկանությունում Վարդաններ շատ լինեն։