ԵՐԵՎԱՆ, 30 մայիսի — Sputnik. Գեղամ Գևորգյանն ընտրվեց Երևանի պետական համալսարանի ռեկտորի ժամանակավոր պաշտոնակատար (ԺՊ): Ինչպես տեղեկացնում է ԵՊՀ մամուլւի ծառայությունից, «Երևանի պետական համալսարան» հիմնադրամի հոգաբարձուների խորհրդի այսօրվա նիստի օրակարգում ընդգրկված էր 2 հարց, որոնցից երկրորդը վերաբերում էր «Երևանի պետական համալսարան» հիմնադրամի կառավարիչ-ռեկտորի ժամանակավոր պաշտոնակատարի նշանակմանը:
Իր ելույթում Գեղամ Գևորգյանը նշեց, որ այս պահին անտրամաբանական է խոսել ծրագրային դրույթների մասին այն պարագայում, երբ երեք ամսվա ընթացքում լինելու են քննաշրջան և արձակուրդ, ապա համալսարանի 100-ամյակին նվիրված միջոցառումներ. «Թե ինչպիսի վարչական աշխատող եմ եղել ես, համալսարանականները գիտեն, ովքեր էլ չգիտեն, այս ընթացքում կարող էին հետաքրքրվել: Այս նույն ամբիոնից ես դեռ երկու տարի առաջ խոսել եմ համալսարանում բարեփոխումների անհրաժեշտության մասին, որն անհետևանք մնաց»:
ԵՊՀ ռեկտորի ԺՊ–ի մյուս թեկնածուն` Վահե Հովհաննիսյանը, ասաց, որ պետք է գործուն քայլեր ձեռնարկենք՝ առողջ մթնոլորտ ձևավորելու համար: «Բացի դրանից՝ կարծում եմ, որ ԵՊՀ ռեկտորի ժամանակավոր պաշտոնակատարը պետք է բավարար պայմաններ ապահովի՝ առաջիկայում ԵՊՀ ռեկտորի ընտրությունը կազմակերպելու համար»,–ասաց նա:
Քվեարկության արդյունքում Գեղամ Գևորգյանը ստացավ 21, իսկ Վահե Հովհաննիսյանը՝ 11 ձայն:
Գեղամ Գևորգյանը 1980-1984 թթ. եղել է ԵՊՀ ուսումնական լաբորատորիայի վարիչ, 1984-1992 թթ.՝ ԵՊՀ դոցենտ, իսկ 1992-1997 թթ.՝ ԵՊՀ պրոֆեսոր:
Նա 1997-2004 թթ. եղել է ԵՊՀ մաթեմատիկական անալիզի ամբիոնի վարիչը, իսկ 2004-2008 թթ.՝ ԵՊՀ մաթեմատիկայի ֆակուլտետի դեկանը: 2008-2019 թթ. Գևորգյանը ԵՊՀ գիտական քաղաքականության և միջազգային համագործակցության գծով պրոռեկտորն էր: 2010 թ.-ից ՀՀ ԳԱԱ ակադեմիկոս է: ԵՊՀ ռեկտորի ժամանակավոր պաշտոնակատարն արժանացել է «Անանիա Շիրակացի» մեդալին և «Հայաստան» համահայկական հիմնադրամի մրցանակին:
Գեղամ Գևորգյանն աշխատել է նաև Հունգարիայի Էտվոշի համալսարանում, Մոսկվայի Սպեկլովի ինստիտուտում և Լեհաստանի ԳԱ մաթեմատիկայի ինստիտուտում:
Հիշեցնենք` մայիսի 23–ին ԵՊՀ նախկին ռեկտոր Արամ Սիմոնյանը հրաժարական տվեց։ Այսօր` մայիսի 30-ին ԵՊՀ կառավարման խորհուրդը պետք է ընտրեր ռեկտորի ժամանակավոր պաշտոնակատար:
Հիշեցնենք, որ Գեղամ Գևորգյանը ԵՊՀ ռեկտոր Արամ Սիմոնյանին դատի էր տվել։ Բանն այն է, որ Գևորգյանը վերջերս ազատվել էր զբաղեցրած պաշտոնից` իր հանդեպ վստահությունը կորցնելու պատճառով։
Գևորգյանը պահանջում էր ռեկտորի հրամանն անվավեր ճանաչել, ինչպես նաև վերականգնել իր աշխատանքը և հարկադիր պարապուրդի համար գումարը բռնագանձել։