ԵՐԵՎԱՆ, 29 մայիսի — Sputnik, Արմենուհի Մխոյան. Գյումրու «Սասստեքս» ընկերության ղեկավարությունը սպառնացել է աշխատանքից ազատել այն բանվորուհիներին, որոնք իրենց աշխատանքային պայմաններից բողոքել էին լրագրողներին:
Ըստ Sputnik Արմենիայի տեղեկությունների` այսօր` մայիսի 29-ին, Գյումրու «Սասստեքս» կարի գործարանի աշխատակիցները լրագրողներին ներկայացրել էին իրենց աշխատանքային պայմաններն ու դժգոհել դրանցից և աշխատավարձից։ Դրանից հետո գործարանի ղեկավարությունը սպառնացել է լրագրողներին բողոքող մոտ 40 աշխատակցի աշխատանքից ազատել: Արդյո՞ք այդպես կվարվեն, թե՞ ոչ, պարզ կդառնա միայն երկուշաբթի՝ մինչ այդ գործարանի ղեկավարությունը կփորձի հստակեցնել աշխատավարձի հետ կապված խնդիրները:
Մինչ լրագրողներին հանդիպելը գործարանի 150 բանվորուհիներն ի նշան բողոքի հրաժարվել էին աշխատել: Նշենք, որ բանվորուհիները պահանջում էին վերանայել իրենց՝ ապրիլ ամսվա աշխատավարձի չափը: Վերջիներիս պնդմամբ 55 հազար դրամի փոխարեն իրենք ստացել են շատ ավելի քիչ՝ 36-ից մինչև 12 հազար դրամ աշխատավարձ: «Շատ դեպքերում աշխատում ենք շաբաթ կամ կիրակի, իսկ դրա դիմաց չենք վճարվում: Ստրուկի պես ենք աշխատում: Հարգելի բացակայությունը կամ հիվանդության թերթիկները չեն վճարվում», -նշեց աշխատակցուհիներից մեկը։
Ի դեպ, աշխատավարձերի կրճատումը գործարանի ղեկավարությունը նախ բացատրել է Եվրոպա ուղարկված անորակ արտադրանքով, մեկ այլ դեպքում` գործավարձային պայմանագրի անցնելով: «Դրանք բոլորը սուտ խոսքեր են, որովհետև այստեղ ապրանքը որակի հսկողություն է անցնում, կան լեհ տեխնոլոգներ, ովքեր հետևում են, այնպես որ դա բացառում ենք»,–ասում են բանվորուհիները։
Հավելենք, որ գործարանից նշում են՝ աշխատավարձի փոփոխությունը կապված է այն բանի հետ, որ աշխատանքային պայմանագրից անցում են կատարում գործարքային պայմանագրի:
Հավելենք` ընկերությունը գործում է Վարդան Սրմաքեշի ներդրումային ծրագրի շրջանակներում: «Սասստեքս» ընկերության տնօրեն Քրիստիան Գելեջին տարիներ շարունակ խոստանում էր միայն Գյումրիում ստեղծել մոտ 300-500 աշխատատեղ: Կառավարությունն այդ նպատակով ընկերությանը տրամադրել է նախկին մարզային հիվանդանոցի շենքը և հարակից տարածքները: Գործարանի նոր մասնաշենքի հիմնարկեքին ներկա էր նաև ՀՀ վարչապետ Նիկոլ Փաշինյանը: