ԵՐԵՎԱՆ, 24 մայիսի — Sputnik. Դանիել Իոաննիսյանի հայտարարությունը պարզապես ծիծաղ է առաջացնում: Այսօր լրագրողների հետ զրույցում այս մասին ասաց ԱԱԾ տնօրեն Արթուր Վանեցյանը` անդրադառնալով «Իրազեկ քաղաքացիների միավորում» ՀԿ համակարգող Դանիել Իոաննիսյանի հայտարարությանն այն մասին, թե ԱԱԾ տնօրենն անմիջական կապեր ունի քրեական հեղինակությունների հետ:
Հիշեցնենք` Իոաննիսյանն ասել էր. «Վստրեչի Ապեր, Վովայի Արշակ, Թոխմախի Բաբո. այդ մարդիկ հիմա իրենց ավելի ազատ են զգում, քան նախկինում։ Այդ մարդիկ Երևանի Էրեբունի վարչական շրջանից են: Ուզում եմ հիշեցնել, որ Արթուր Վանեցյանն էլ նախկինում ԱԱԾ Էրեբունու բաժնում է աշխատել և դեռ այն ժամանակներից, ըստ շրջանառվող լուրերի, բավականին մտերիմ հարաբերություններ ունի նրանց հետ»։
«Եթե այդ տրամաբանությամբ շարժվենք, ապա ամբողջ երկրում եղել են, կան հանցավոր հեղինակություններ, մարդիկ, տարբեր մականունավորներ: Եթե շարժվենք նրա տրամաբանությամբ, ապա որտեղ աշխատել եմ, ուրեմն բոլորի հետ շփվել եմ: Ես չեմ ուզում գնահատական տալ Դանիել Իոաննիսյանի հայտարարություններին, կասեմ՝ ամոթ է: Ամոթ է, որ փորձ է արվում խարխլել ԱԱԾ տնօրենի այն հեղինակությունը, որը ձևավորվել է այս մեկ տարվա ընթացքում»,– ասաց Վանեցյանը։
ԱԱԾ տնօրենը նաև նշեց, որ իր նշանակման առաջին ամիսներին Դանիել Իոաննիսյանն ու քաղհասարակության այլ ներկայացուցիչներ իր հետ ակտիվ շփվում էին, զանգահարում, ասում, որ ԱԱԾ-ն վերջապես փոխվել է։
«Այնուհետև, ինչ-ինչ պատճառներով պարոն Իոաննիսյանն ինչ-որ տեղից պատվեր ստանալուց հետո սկսեց սուտ լուրեր տարածել, որի տակ հիմքեր չկան»,- ասաց Վանեցյանը։
Ինչ վերաբերում է Իոաննիսյանի թվարկած քրեական հեղինակություններին, Վանեցյանը նշեց, որ դրանցից մի քանիսին իսկապես ճանաչում է։
«Բաբկեն Ղազարյանը, որին Իոաննիսյանը Թոխմախի Բաբո է անվանել, գնդապետ է, աշխատել է Էրեբունի վարչական շրջանի ղեկավարի տեղակալ. և ի պաշտոնե ես շփվել եմ: Ինչ վերաբերվում է Արշակ Հակոբյանին, որը եղել է նախկին ոստիկանապետի թիկնազորի ղեկավարը, մենք աշխատել ենք ռազմական ոստիկանությունում: Ճանաչել եմ, որովհետև ինքը եղել է սպա, ես՝ զինվոր: Երրորդ անձը Վստրեչի Ապերն է՝ Արամ Վարդանյանը: Ես իր հետ շփվել եմ գործնական, նա կատարել է իրավախախտում, ես իրեն բերման եմ ենթարկել: Այլ շփումներ չունեմ։ Խորհուրդ կտամ, որ պարոն Իոաննիսյանը հանգիստ նստի տեղը»: – ասաց Վանեցյանը։
Հիշեցնենք, «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը հայտարարել էր, որ Ազգային անվտանգության ծառայությունն ու ԱԱԾ ղեկավար Արթուր Վանեցյանն իրենց լիազորությունների շրջանակից դուրս են գալիս։ Նա նաև հայտնել էր, որ ՊՎԾ պետ Դավիթ Սանասարյանի գործով Վանեցյանն ամբողջությամբ չի վայելում վարչապետ Նիկոլ Փաշինյանի վստահությունը։