ԵՐԵՎԱՆ, 23 մայիսի — Sputnik. ԲՀԿ-ն առաջարկում է ԱԺ արտագնա նիստեր անցկացնել մարզերում: Այս մասին այսօր ԱԺ Պետաիրավական հարցերի մշտական հանձնաժողովի նիստում ԲՀԿ առաջարկը ներկայացրեց պատգամավոր Սերգեյ Բագրատյանը:
«Ոչ մի ծախս էլ չի ավելանա: Առավոտյան 4-5 ավտոբուսով կգնանք մարզ: Այդ ընթացքում կքննարկենք մարզի խնդիրները, կկազմակերպենք նաև քաղաքացիների ընդունելություն: 134 պատգամավոր միանգամից կընդունեն ու կլսեն ժողովրդին»- ասաց Բագրատյանը,- ի վերջո այդ կոլեկտիվիզմը մենք ավելի ենք կարևորում, քան թե այստեղ իրար վրա ֆշշացնելը»:
Նիստին ներկա ՀՀ արդարադատության նախարար Արտակ Զեյնալյանը կատակեց. «Ֆշշացնում են, երբ տեսախցիկներ են ներկա»: Սերգեյ Բագրատյանն էլ արձագանքեց» «Նիստերը փակ կանցկացնենք, առանց լրատվամիջոցների»:
Թե ինչ կարգով ու ինչպես է հնարավոր կազմակերպել ԱԺ արտագնա աշխատանքը, դեռ հստակ չէ: Դրա համար կառավարությունն ու խորհրդարանը պայմանավորվել են ԲՀԿ-ի առաջարկած օրինագծի քննարկումը հետաձգել 2 ամսով ու այդ ընթացքում դրան տալ առավել առարկայական բնույթ: