ԵՐԵՎԱՆ, 21 մայիսի — Sputnik. Արամ Բաղդասարյանը հրաշքով փրկել է կնոջն ու 5 երեխաներին Վոլգոգրադի մերձակայքում գտնվող Զելյոնի կղզու իրենց սեփական տանը բռնկած հրդեհի ժամանակ։
Ինչպես հայտնում են ռուսական ԶԼՄ–ները, միջադեպը տեղի է ունեցել մայիսի 19-ի լույս 20-ի գիշերը։ Առաջինը վառվածի հոտն առել է Արամի կինը` Եկատերինան, և արթնացրել ամուսնուն։ Արամը գնացել է կաթսայատուն և տեսել, որ պատն ամբողջությամբ հրդեհվել է։
Սկզբում Բաղդասարյանը ինքնուրույն է փորձել մարել կրակը, սակայն հասկացել է, որ ժամանակ է կորցնում։
«Թողեցի ամեն ինչ և վազեցի փրկելու կնոջս ու երեխաներին։ Ոչինչ չվերցրեցինք, այդ թվում նաև փաստաթղթեր։ Հրդեհի հետևանքով այրվեց ամեն ինչ։ Միևնույն ժամանակ հրշեջները շատ արագ ժամանեցին, արեցին իրենցից կախված ամենը», – պատմել է Արամը «Блокнот Волгограда» պարբերականին։
Արամն ու Եկատերինան 4 դուստր և մեկ որդի ունեն։ Որդին` Նորիկը, 1 տարեկան 10 ամսական է, ավագ դուստր Անգելինան` 9 տարեկան։
Հրշեջները բավական արագ տեղ հասան և 22 րոպեի ընթացքում մարեցին հրդեհը, բայց երկհարկանի շենքից գրեթե ոչինչ չէր մնացել։
Նշվում է, որ ընտանիքը Վոլգոգրադ է տեղափոխվել մի քանի տարի առաջ։ Այստեղ նրանք հողատարածք են գնել և մեծ երկհարկանի տուն կառուցել։ Հիմա նրանք ամեն բան կորցրեցին. տունը, գույքը, մեքենան։
Հրդեհի բռնկման պատճառները պարզվում են, բայց Բաղդասարյանը կարծում է, որ կարճ միացում է տեղի ունեցել։
Քաղաքացիներից շատերն օգնության են հասել ընտանիքին, սնունդ ու հագուստ բերել։ Առայժմ նրանք բարեկամների մոտ են ապրում, բայց պետությունը բազմանդամ ընտանիքին արդեն մեկսենյականոց բնակարան է տրամադրել վեց ամսով։ Արամը և Եկատերինան հասկանում են, որ հեշտ չի լինի, քանի որ ամեն ինչ պետք է սկսել նորից, բայց ուրախ են, որ բոլորը ողջ են մնացել։ Այժմ նրանք զբաղված են փաստաթղթերը վերականգնելով։