ԵՐԵՎԱՆ, 21 մայիսի — Sputnik. Պապիլոմայի դեմ նախատեսված «Գարդասիլ» պատվաստանյութի ներդրման համար Հայաստանը դրամաշնորհ ստացել է դեռ 2016–ին, իսկ գումարը Հայաստանին է փոխանցվել 2017–ին։ Sputnik Արմենիայի հարցին ի պատասխան, թե ճի՞շտ են լուրերը, որ առողջապահության նախարարությունը նոր դրամաշնորհ է ստացել, հայտնեց Առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական Գայանե Սահակյանը։
«Հայաստանը բոլոր նոր պատվաստումները ներդրել է «Գավիի» միջոցով` որպես աղքատ, ցածր համախառն ներքին արդյունք ունեցող երկիր։ Եվ 2016–ին, երբ առողջապահության նախարար էր Արմեն Մուրադյանը և ում համաձայնությամբ, ինչպես նաև բազմաթիվ քննարկումների արդյունքում, որոշվեց «Գավիի» օժանդակությամբ ներդնել «Գարդասիլ 4» պատվաստանյութը։ Վերջին անգամ այդ դրամաշնորհն ենք ստացել, նոր դրամաշնորհ չենք ստացել»,–ասաց նա։
Նա հայտնեց նաև, որ իրենք գումար են ստացել պատվաստման ներդրման նախապատրաստական միջոցառումների համար` բուժաշխատողների դասընթացներ, հանրային իրազեկման նյութերի տպագրում և այլն։ Սահակյանը հավաստիացրեց, որ այդ մասին դեռ 2017–ին «Գավիի» պաշտոնական կայքում էլ է գրվել։
Ի դեպ, Հայաստան ներմուծված «Գարդասիլի» ժամկետը լրանում է այս տարվա հոկտեմբեր ամսին, և հետագայում, եթե Հայաստանը շարունակի գնել այդ պատվաստանյութը, այն «Գավիի» աջակցությամբ հնարավոր կլինի ձեռք բերել ամենացածր գնով` 4.5 դոլարով։ Սահակյանի խոսքով` պատվաստանյութի մեկ դեղաչափի գումարն իրականում 70-100 դոլար է։ Սահակյանը հայտնեց, որ դեռ պարզ չէ` Հայաստանը «Գարդասիլի» նոր խմբաքանակ ձեռք կբերի՞, թե՞ ոչ։
Նա անդրադարձավ նաև լուրերին, թե Հայաստանը պապիլոմայի դեմ պատվաստման տարիքային շեմը 13–ից հասցրել է 45–ի սահմանին, քանի որ պատվաստանյութի ժամկետը շուտով լրանալու է։ Ըստ նրա` Առողջապահության համաշխարհային կազմակերպության կայքում այդ պատվաստման համար տարիքային վերին շեմ սահմանված չէ։
«Խնդիրն այն է, որ եթե մեծ թվով մարդիկ պատվաստվեն, դրանով կազդենք վիրուսի շրջանառության վրա։ Իսկ մենք ընտրել ենք մինչև 45 տարեկանի շեմը` հաշվի առնելով մի շարք երկրների փորձը»,–ասաց նա։
Հիշեցնենք, որ «Գավին» Հայաստանին աջակցում է 2000 թվականից՝ երկրում նոր պատվաստանյութերի ներդրման, ինչպես նաև պատվաստումային ծառայությունների օժանդակության ծրագրերով։
Մարդու պապիլոմա վիրուսային վարակի դեմ «Գարդասիլ» պատվաստանյութով պատվաստումները Հայաստանում պաշտոնապես մեկնարկել են 2017թ-ի դեկտեմբերի 11-ից։ Թիրախային խումբ են ընտրվել 13 տարեկան աղջիկները, քանի որ պատվաստումը պետք է կատարվի մինչև առաջին սեռական հարաբերությունը։
Պատվաստումն իրականացվում է կամավորության սկզբունքով։ Հրաժարվելու դեպքում ծնողը պետք է ներկայանա պոլիկլինիկա և ձեռագիր հրաժարական գրի` հավաստելով, որ իրազեկված է հնարավոր հետևանքների մասին։ «Գարդասիլը» կանխարգելում է արգանդի վզիկի քաղցկեղի առաջացումը, որը, ըստ պաշտոնական վիճակագրության, Հայաստանում տարեկան 120 կնոջ կյանք է խլում: