ԵՐԵՒԱՆ, 20 մայիսի — Sputnik. Հայաստանի մէջ եղած համակարգային կաշառակերութենէն Արցախի մեր հայրենակիցներն աւելի շատ տուժած են: Այսօր կառավարութեան անդամներուն ու իրաւական մարմիններու ղեկավարներուն հետ դատական համակարգին նուիրուած հանդիպում–քննարկման յայտարարեց ՀՀ վարչապետ Նիկոլ Փաշինեան:
«Բայց այդ համակարգի որոշ պաշտօնեաներ կը գործադրեն ապականուած կապերն Արցախի մէջ ՀՀ կառավարութեան ու անձամբ վարչապետին դէմ ստայօդ քարոզչութիւն իրականացնելու համար: Այս ամէնը վերլուծելով` ատոր տակ կը տեսնեմ ընդհուպ դաւադիր պատերազմ հրահրելու, անգամ որոշ տարածքներ յանձնելու եւ տեղի ունեցածի պատասխանատուութիւնը ՀՀ կառավարութեան վրայ դնելու դաւադիր նպատակ: Այս իմաստով ատիկա կը համարեմ պետական դաւաճանութեան նմանուող գործողութիւն եւ, որպէս Արցախի անվտանգութեան երաշխաւորը հանդիսացող ՀՀ վարչապետ, պատերազմական իրավիճակներուն` զինուած ուժերու գերագոյն գլխաւոր հրամանատար, պիտի ձեռնարկեմ ամենակոշտ միջոցները այս դաւադիր մտադրութիւններն արմատախիլ ընելու համար»,– ըսաւ վարչապետը:
Նիկոլ Փաշինեան նաեւ կարծիք յայտնեց, որ հասունացած է ժամանակը` 2016–ի ապրիլեան պատերազմի հարցով ԱԺ քննիչ յանձնաժողով ստեղծելու համար:
Փաշինեան իր ելոյթին մէջ Արցախի ժողովուրդին կոչ ըրաւ «ոչ ըսել բոլոր անոնց, որոնց գործողութիւնն ուղղուած է երկու ժողովուրդներու միջեւ հակասութիւններ սերմանելուն:
«Արցախի ժողովուրդին կոչ կ’ընեմ աջակցելու միայն այն ուժերուն, որոնք հանդէս կու գան ՀՀ ժողովուրդի եւ անոր օրինական կառավարութեան աներկբայ աջակցութեան դիրքերէն»,– ըսաւ Փաշինեան:
Միւս բոլոր ուժերը, անոր խօսքով, միայն մէկ նպատակ ունին` «Արցախի ժողովուրդին օգտագործել իրենց անցեալին գործած յանցագործութիւններու պատասխանատուութենէն խուսափելու համար»:
Ըստ Փաշինեանի, այդ ուժերը դաւադրութիւններ կը հրահրեն ՀՀ եւ Արցախի դէմ:
Յիշեցնենք` ՀՀ վարչապետ Նիկոլ Փաշինեան մայիսի 19–ին յայտարարած էր, որ մայիս 20-ի առաւօտեան ժամը 08.30-էն պէտք է արգելափակել հանրապետութեան` առանց բացառութեան բոլոր դատարաններու ելքերն ու մուտքերը, այնպէս, որ ոչ ոք ներս մտնէ: