ԵՐԵՎԱՆ, 11 մայիսի — Sputnik. Հայաստանում փորձելու են լուծել հասցեների հետ կապված խնդիրները։ Facebook սոցիալական ցանցի իր էջում այս մասին գրել է Անշարժ գույքի կադաստրի կոմիտեի պետ Սարհատ Պետրոսյանը։
«Մենք փորձելու ենք մեկընդմիշտ մոռանալ տարբեր կերպ գրված հասցեները, անտրամաբանական համարակալումները, քարտեզներում բացակայող հասցեներն ու էլի շատ մանր-մունր խնդիրների, որոնց առերեսվում ենք յուրաքանչյուր օր»,– նշել է նա։
Պետրոսյանի խոսքով` սա «նոր կադաստրում» նախաձեռնած կարեւոր բարեփոխումներից մեկն է, որը քաղաքացիների կյանքը հեշտացնելուց բացի, նպաստելու է նաև տնտեսության տարբեր ոլորտների` զբոսաշրջության, լոգիստիկայի, տաքսի ծառայությունների արդյունավետության բարձրացմանը։
Կադաստրի այս առաջարկը, ի դեպ, երեկ կառավարության նիստում արժանացավ նաև ՀՀ կառավարության հավանությանը։
Բարեփոխման հեղինակներն ուսումնասիրել են Հայաստանի հասցեների ռեեստրը և պարզել, որ այն պարունակում է մեծ թվով սխալ և թերի տեղեկություններ, բազմաթիվ համայնքներում նոր հասցեները չեն գրանցվել, կատարված փոփոխությունները չեն ներառվել հասցեների ռեեստրում ու քարտեզներում։