Փաշինյանի հարցը Սերժ Սարգսյանին. ի՞նչ է ուզում նա ճշտել նախկին նախագահից

ԵՐԵՎԱՆ, 8 մայիսի — Sputnik. «Միմինոն» նայե՞լ եք, որ ասում է. «такие вопросы задаете неудобно отвечать, стыдно»։ Այսօր հրավիրած հաշվետու ասուլիսում ասաց ՀՀ վարչապետ Նիկոլ Փաշինյանը` պատասխանելով Սերժ Սարգսյանի հնարավոր վերադարձի և խոստացված ասուլիսի մասին հարցին։

«Էդ որ Սերժ Սարգսյանն ասուլիս է տալու, դա շատ լավ է։ Բայց ես հույս ունեմ, որ այնտեղ հետևյալ հարցը կհնչի. «Պարոն Սարգսյան, էդ ինչպե՞ս էր, որ Հայաստանի ազգային բանակի զինվորը մայկա–տռուսիկ չուներ, իսկ ձեր ընտանիքի անդամները միլիոնատերեր են»։ Այս հարցին, երբ որ կպատասխանի Սերժ Սարգսյանը, էն ժամանակ ես ձեր ասած հարցին կպատասխանեմ։ Իսկ մինչև ձեր ասած ցիկլը Սերժ Սարգսյանը դեռ այնքա՜ն հարցերի պետք է պատասխանի»,– ասաց Փաշինյանը ` կարծիք հայտնելով, որ որոշ հարցերի Սերժ Սարգսյանը չի էլ կարողանա պատասխանել։

«Այս հարցերին ոչ միայն Սերժ Սարգսյանը պիտի պատասխանի, այլև Ռոբերտ Քոչարյանը և բազում այլ միլիոնատեր պաշտոնյաներ։ Պետք է պատասխանեն, թե ինչպես է, որ Հայաստանում իրենց երեխաները, փեսաները, եղբայրներն ու քույրերը միլիոնատեր են դարձել»,– ասաց Փաշինյանը։

ՀՀ վարչապետը միաժամանակ նաև հայտարարեց, որ բիզնեսով հարստանալու մասին պատասխանն արժանահավատ չէ։ Որպես օրինակ Փաշինյանը նշեց, որ իր որդին չի կարող Հայաստանում բիզնես անելով դառնալ միլիոնատեր։

Բայց եթե պարզվի, որ իր վարչապետության օրոք իր ընտանիքի որևէ անդամ միլիոնատեր է դարձել, ինքը հաջորդ պահին պիտի բանտում լինի։