ԵՐԵՎԱՆ, 4 մայիսի — Sputnik. Ճանապարհային ոստիկանությունը հետիոտնային տեղաշարժի անվտանգության բարելավման նպատակով հետիոտնային նոր անցում կգծանշի Միկոյան փողոցում։ Այս մասին նշված է ՀՀ ոստիկանության Facebook սոցիալական ցանցի էջում։
«Երևան քաղաքի Ա.Միկոյան փողոցի (Եղվարդի խճուղի) Դավիթաշեն 4-րդ թաղամասի 27-րդ շենքի դիմացի ճանապարհահատվածում 2019թ. մայիսի 5-ին կկազմակերպվի արհեստական անհարթության հետ համատեղմամբ՝ անհրաժեշտ ճանապարհային նշաններով ու գծանշումներով կահավորված հետիոտնային անցում»,–նշված է ոստիկանության հաղորդագրության մեջ։
Այդ հատվածում տրանսպորտային միջոցների երթևեկության առավելագույն թույլատրելի արագությունը կսահմանվի 40կմ/ժ:
«Ասֆալտը բարձրացնում եք, լավ եք անում, բա գծանշումներն ու զգուշացնող նշաններն ինչի՞ միանգամից չեք դնում»,– ոստիկանության հրապարակած հաղորդագրությունը մեկնաբանել է օգտատերերից մեկը։
«Երեկ անհարթությունը կար, իսկ գծանշումներն ու ճանապարհային նշանները բացակայում էին: Մեքենաները գալիս, ջարդուխուրդ լինելով թռնում էին»,– գրել է մեկ ուրիշը։
Սանո Պետրոսյան անուն–ազգանունով օգտատերն էլ առաջարկել է այդ հատվածում ոչ թե թումբ սարքել, այլ վերնանցում կառուցել։
Հիշեցնենք, որ ՀՀ ճանապարհային ոստիկանությունը նախատեսում է մայիսի 5–ից մի շարք փոփոխություններ կյանքի կոչել։