ԵՐԵՎԱՆ, 4 մայիսի – Sputnik. Ոստիկանության Մալաթիայի բաժինն այսօր՝ մայիսի 4-ին, ժամը 18:40-ի սահմանում ահազանգ է ստացել, որ Երևանի Շերամի փողոցի շենքերից մեկի բնակիչը չի արձագանքում դռան և հեռախոսի զանգերին: Այս մասին հայտնում է shamshyan.com–ը։
Նշված վայր է ժամանել ոստիկանության Մալաթիայի բաժնի օպերատիվ խումբը:
Նույն բաժնի քրեական հետախուզության բաժանմունքի ծառայողները, բացելով բնակարանի դուռը, ներսում հայտնաբերել են բերանքսիվայր ընկած տանտիրոջ՝ 43-ամյա Մ. Հ.-ի դին:
Ոստիկանները բնակարանում հայտնաբերել են կնոջն ուղղված երկտող, որում գրված է եղել. «Ես շատ եմ սիրում քեզ, իմ հրաշք: Ներեք ինձ, ես եմ մեղքի ծնունդը, թող աղջիկս նման բանի մասին չիմանա»:
Հետաքննիչը երկտողը առգրավել է, նշանակվել են մի շարք փորձաքննություններ, այդ թվում՝ դիակի դատաբժշկական և ձեռագրաբանական: