Sputnik Արմենիան թեմայի շուրջ զրուցել է արաբագետ Արմեն Պետրոսյանի հետ։
Պետրոսյանի խոսքով` շատ մեղմ է նշել՝ «հայկական ջոկատ»:
«Այդ ապատեղեկատվությունը տարածողները խոսում էին շատ ավելի մեծաթիվ կազմավորման՝ գումարտակի մասին: Բայց պետք է միանգամից արձանագրել, որ սա ընդամենը քրդական քարոզչամեքենայի կողմից ապատեղեկատվության տարածում էր: Դա, բնականաբար, ունի իր նպատակները՝ հաշվի առնելով քրդական ուժերի շահերը, այն իրավիճակը, որ այսօր ստեղծվել է Սիրիայի քրդաբնակ շրջաններում, այն սպառնալիքները, որոնց օբյեկտիվորեն բախվել են շրջանը վերահսկող քրդական ուժերը»,– ասում է նա:
Արմեն Պետրոսյանը քարոզչական առումով հաշվարկված դրսևորումներ է համարում նաև այն, որ նշված ջոկատի մասին տեսանյութը տարածվեց ապրիլի 24-ին, ՀՀ դրոշի պատկերմամբ: Արաբագետի կարծիքով, ի լրումն ամենի, դա պարարտ հող է ստեղծում թուրքական ու ադրբեջանական քարոզչամեքենաների համար, միաժամանակ կարող է Սիրիայի հայությանը տարամետ ուժերի կողմից թիրախավորելու առիթ տալ:
Նրա խոսքով` կոնկրետ քրդական ուժերի կողմից «հայկական ջոկատի» հարց ներկայացնելը, ամենից բացի, նպատակ ունի ցույց տալ, թե միայն քրդերը չեն ձգտում ինքնավարության, այլ նաև տվյալ տարածքում ապրող մյուս էթնիկ խմբերը:
«Տեսանյութում պատկերված մարտիկները, պետք է նկատել, եղել են քրդական տարբեր կազմավորումների մեջ և ժողովրդական ինքնապաշտպանական ջոկատների ու հատկապես Սիրիայի դեմոկրատական ուժերի շարքերում պայքարել են իսլամիստական ահաբեկչական ուժերի դեմ: Բայց երբևէ խոսք չի եղել հայկական առանձին մարտական ստորաբաժանում ձևավորելու մասին: Ակնհայտ է, որ նման քայլերը կարող են թիրախավորման հետևանք ունենալ Սիրիայի հայության համար:
Սիրիահայ համայնքը հակամարտության ողջ ընթացքում պահպանել է իր դրական չեզոքությունը, որի շնորհիվ էլ կարողացել է նվազագույն կորուստներով դուրս գալ իրավիճակից»,– ասում է արաբագետը։
Նրա խոսքով` բնական է, որ համայնքի պաշտոնական արձագանքի մեջ ընդգծվում է, որ Սիրիայի հայ համայնքի դիրքորոշումը միշտ եղել է միասնական Սիրիայի պահպանումը: