Լիլիթ Հարությունյան, Sputnik Արմենիա
Յարխուշտան ռազմիկների հին հայկական պար է, որը կատարվել է մարտից առաջ` մարտական ոգին բարձրացնելու և զորքերին համախմբելու համար։ Այսօր այն ասոցացվում է խիզախության և տոկունության հետ։
Ինչպիսի՞ տեսք ունի յարխուշտան երկու տարեկան փոքրիկի կատարմամբ։ Արեգ Այվազյանը սկսել է կատարել այդ պարը, երբ դեռ երկու տարեկան էլ չկար։ Ունենալով կատարյալ երաժշտական լսողություն` երեխան ոչ միայն հիանալի զգացել է ռիթմը, այլ նաև լիովին փոխանցել է պարի մարտական ոգին։ Ծնվելով ազգային պարերի մանկավարժների` Արտավազդ Այվազյանի և Աննա Բաբայանի ընտանիքում` նա ասես մոր կաթի հետ յուրացրել է յարխուշտայի, քոչարու և այլ ազգային պարերի փիլիսոփայությունը և հայրենասիրությունը։ Ի դեպ, հենց նրա պատվին է անվանվել դպրոցը` «Արեգ», որտեղ դասավանդում են նրա ծնողները։
Տաղանդավոր փոքրիկի մասնակցությամբ տեսանյութերը սոցիալական ցանցերում հավաքել են հարյուր հազարավոր դիտումներ։ Իր ձիրքի շնորհիվ նա նույնիսկ դարձել է «Մարդկային գործոն» հայտնի հեռուստահաղորդման հերոսը։
Հիմա Արեգը 7 տարեկան է։ Նա դպրոց է գնում և շախմատ խաղում։ Իսկ պարերը դարձել են նրա կյանքի անքակտելի մասը։
«Մեր պարային համույթում հիմա գործում է կրտսեր խումբ։ Արեգն այնտեղ պարում է, երբեմն էլ` դասավանդում։ Նա իրեն անվանում է խմբի գեղարվեստական ղեկավարը», – կատակով ասում է տղայի մայրը։
Այնուամենայնիվ, պարն Արեգի միակ սիրելի զբաղմունքը չէ. նա գնում է նաև մարմնամարզության և կարատեի։ Դպրոցական առարկաներից ամենից շատ սիրում է հայոց և ռուսաց լեզուները, ինչպես նաև մաթեմատիկան։
Մեր հարցին, թե նա ինչ է ուզում դառնալ, երբ մեծանա, տղան լուրջ տեսքով պատասխանում է`ծրագրավորող։
– Իսկ ինչո՞ւ։
– Հետաքրքիր խաղեր ստեղծելու համար։
– Իսկ պա՞րը։
– Ես միշտ պարելու եմ և ելույթ ունենալու, – առանց երկմտելու պատասխանում է փոքրիկ Արեգը։
Աննան պատմում է, որ որդին սիրում է այցելել թանգարաններ և լսել հետաքրքիր պատմություններ։
– Արեգ, դու երազանք ունե՞ս, – հարցնում եմ տղային։
– Այո, ցանկանում եմ լինել աշխարհի շատ երկրներում, – պատասխանում է նա։
Սակայն, ինչպես պատմում է նրա մայրը, Արեգն ամենից շատ երազում է քույրիկ կամ եղբայր ունենալու մասին։
«Ասում է, որ ուզում է խնամել նրանց և մեր պարերը սովորեցնել, որպեսզի միասին թնդացնեն դահլիճը», – ծիծաղելով պատմում է Աննան։
Պետք է ասել, որ Արեգը հաճախ է ելույթ ունենում և հիացնում հանդիսատեսին։ Դե ինչ, հուսանք, որ շուտով նա և՛քույր, և՛ եղբայր կունենա, որոնց հետ միասին կկարողանա իսկապես «պայթեցնել» բեմը։