ԵՐԵՎԱՆ, 28 Ապրիլ — Sputnik. Վայոց ձորում կրքերը շարունակվում են բորբոքվել։ Քաղաքացու օրը տեղի ունեցած վիճաբանությունը նոր թափ է ստանում։
Ինչպես արդեն տեղեկացրել էինք, երեկ Վայոց ձորի փոխմարզպետ Ռազմիկ Տոնոյանը հաղորդում էր ներկայացրել Ոստիկանության Եղեգնաձորի բաժին՝ տեղեկացնելով, որ Քաղաքացու օրվա առիթով կազմակերպված միջոցառման ընթացքում իր վրա հարձակվել, վիրավորել, հայհոյանքներ են հնչեցրել ԱԺ ԲՀԿ խմբակցության պատգամավոր Սերգեյ Բագրատյանն ու Արտաբույնք վարչական համայնքի ղեկավար Արմեն Սեդրակյանը:
Եղեգիս խոշորացված համայնքի ղեկավար Արթուր Ստեփանյանը Sputnik Արմենիայի հետ զրույցում ասաց, որ Տոնոյանի հաղորդումների պատճառով «տարի ու կես է՝ Ոստիկանությունից տուն չի գալիս»:
Անդրադառնալով Ստեփանյանի խոսքին և մեզ հասած այն տեղեկություններին, որ ինքը մարզում շատերի հետ խնդիր ունի՝ փոխմարզպետ Տոնոյանը կարծիք հայտնեց, որ այդ ամենն իր աշխատելաոճի հետ է կապված: «Բա թող ԱԱԾ-ին հայտնի, թե իրեն անհիմն են հետապնդում ոստիկանները: Ես դարանակալած չեմ սպասում, որպեսզի համայնքի ղեկավարները սխալներ անեն, գնամ, կանգնեմ գլխներին: Եթե քսանմեկ տարեկան աղջկան գործի է ընդունել որպես գիշերային պահակ, եթե միլիոն ու կես (գումարի չափը դժվարանում եմ հստակ նշել) փող է վերականգնում։ Արթուրին (հեղ.Եղեգիս խոշորացված համայնքի ղեկավար) որ նայես որպես մարդ, ինքը վատ մարդ չի, от души տղա է, բայց մենք այդպիսի կոչում, հաստիք չունենք՝ լավ տղայի հաստիք»,–ասաց Տոնոյանը։
Ավելի մանրամասն խոսել Ռազմիկ Տոնոյանը չցանկացավ՝ ասելով, որ դեռ դրա ժամանակը չէ: Նա հավելեց, որ իր կողմից հնչեցված յուրաքանչյուր խոսքի ապացույց է ավելացվելու, մասնավորապես, խոստացավ շուտով սկանդալային դարձած միջադեպի հետ կապված նաև տեսանյութ հրապարակել: