ԵՐԵՎԱՆ, 28 ապրիլի — Sputnik. «Քաղաքացու օրվա» միջոցառումների ժամանակ միջադեպ է գրանցվել Վայոց Ձորում։
Ինչպես հաղորդում է Shamshyan.com-ը, երեկ՝ ապրիլի 27-ին, ժամը 18:00-ի սահմաններում ոստիկանության Եղեգնաձորի բաժին ահազանգ է ստացվել Վայոց Ձորի փոխմարզպետ Ռազմիկ Տոնոյանից:
Նա հայտնել է, որ նույն օրը ժամը 16:30-ի սահմաններում Եղեգնաձոր քաղաքի Շահումյան փողոցում «Քաղաքացու տոնին» նվիրված միջոցառման ժամանակ իրեն են մոտեցել ԱԺ ԲՀԿ խմբակցության պատգամավոր Սերգեյ Բագրատյանը և Վայոց Ձորի մարզի Եղեգիս համայնքի Արտաբույնք բնակավայրի վարչական ղեկավար Արմեն Սեդրակյանը: Ըստ Տոնոյանի հաղորդման՝ պատգամավորն ու վարչական շրջանի ղեկավարն իր հասցեին սեռական բնույթի հայհոյանքներ, անվայել արտահայտություններ են հնչեցրել, վիրավորել, փորձել են հարձակվել իր վրա և հարվածել: Փաստի առթիվ ոստիկանության Եղեգնաձորի բաժնի հետաքննչական բաժանմունքում նյութեր են նախապատրաստվում:
Ըստ տեղեկությունների՝ Ա. Սեդրակյանը հայտնաբերվել է, հրավիրվել ոստիկանություն, իսկ Ս. Բագրատյանը դեռևս չի հայտնաբերվել: