ԵՐԵՎԱՆ, 26 ապրիլի — Sputnik. ԶՈւ–ն առողջ օրգանիզմ է, դրա համար, երբ ինչ–որ թարախիկներ, միկրոբիկներ են հայտնվում, բոլորն այդ մասին իմանում են։ Պատասխանելով տարածված լուրին, թե Արցախի Մարտակերտի շրջանի զորամասերից մեկում սպան սեռական ոտնձգություններ է ունեցել զինվորի նկատմամբ` այսօր լրագրողներին ասաց ՀՀ ՊՆ Դավիթ Տոնոյանը։
«Լինում են այդպիսի բաներ, ինչպես հասարակության մեջ, այնպես էլ Զինված ուժերում, բայց ԶՈւ–ում ավելի քիչ»,–նշեց Տոնոյանը։
Ավելին ՀՀ պաշտպանության նախարարը չկարողացավ հայտնել, որովհետև ընդամենն առավոտյան ժամը 5–ին է վերադարձել Մոսկվայից։ Նա հավելեց, որ լսել է միջադեպի մասին մամուլից և խոստացավ` նոր տեղեկություններ ունենալու դեպքում հայտնել և հետամուտ լինել։
Հիշեցնենք, որ օրերս մամուլում տեղեկություն էր հայտնվել, թե իբր Արցախի Մարտակերտի զորամասերից մեկում զինծառայողը սեռական և այլ բռնության է ենթարկվել սպայի կողմից։