ԵՐԵՎԱՆ, 25 ապրիլի — Sputnik. Արմավիրում 2018թ–ին բացված կենցաղային տեխնիկայի «Այ Էմ Ջի գրուփ» գործարանն արդեն սկսում է արտադրությունը։ Այս մասին այսօր կառավարության նիստում հայտարարեց տնտեսական զարգացման և ներդրումների նախարար Տիգրան Խաչատրյանը` կառավարությանն առաջարկելով մաքսատուրքից ազատել արտադրության համար Հայաստան ներկրվող տեխնոլոգիական սարքավորումներն ու տեխնիկայի բաղկացուցիչ մասերը։
Նախարարի զեկույցի ընթացքում ՀՀ վարչապետ Նիկոլ Փաշինյանը հիշեցրեց, որ մամուլում այս գործարանի մասին հրապարակումներ եղան, որ այն «ֆեյք էր»։ Գնացինք, բացեցինք ու չաշխատեց»,– ասաց վարչապետը։
Խաչատրյանը վստահեցրեց, որ գործարանն իրականում ֆեյք չէ։
«Ուզում եմ հատուկ նշել, որ լրացուցիչ հարցում ենք կատարել։ Մի քիչ ուշացել են պլանները, բայց աշխատակիցները վերապատրաստված են։ Առաջին խմբաքանակը, որ սպասվում է արդեն Փոթիից Երևան ճանապարհին է»,– ասաց Խաչատրյանը` հավելելով, որ տեխնիկայի առաջին խմբաքանակը մեկ ամսվա ընթացքում կարտադրվի ու կներկայացվի շուկա։
«Այսինքն` հիմա հայկական արտադրության հեռուստացույց լինելո՞ւ է, հա՞»,– ճշտեց վարչապետ Փաշինյանը։ Ի պատասխան նախարարը վստահեցրեց, որ ծրագիրն իրոք լուրջ է ու իրական։
Հիշեցնենք` «Այ Էմ Ջի գրուփ» գործարանը Հայաստանում իրականացնելու է չինական արտադրության հեռուստացույցների, օդորակիչների ու այլ կենցաղային տեխնիկայի մասերի միացման ու հավաքման աշխատանքներ։
Գործունեության ընթացքում գործարանի սեփականատերերը խոստացել են 4.9 մլրդ ԱՄՆ դոլարի ներդրում անել, տարեկան արտադրել 90 000 միավոր տեխնիկա, մի մասն արտահանել երրորդ երկրներ, մյուս մասը` վաճառել ներքին շուկայում։