ԵՐԵՒԱՆ, 25 ապրիլի — Sputnik. Մօր լեարդի փոխպատուաստման համար տոնոր հանդիսացած 20–ամեայ աղջկան վիճակը լաւ է, գիտակցութիւնը տեղն է, եւ կը նախատեսեն անոր վերակենդանացման բաժանմունքէն հիւանդասենեակ տեղափոխել: Մօր վիճակը նոյնպէս կայուն է` ամէն ինչ կ’ընթանայ բժիշկներու կանխատեսածին պէս: Այս մասին լրագրողներուն հետ զրոյցին ըսաւ Բուռնազեանի անուան պետական գիտական կեդրոնի վիրաբուժական գիծով փոխտնօրէն, վիրաբուժական եւ փոխպատուաստման կեդրոնի ղեկավար Սերգէյ Ոսկանեան:
Հայաստանի մէջ առաջին անգամ կատարուած է լեարդի փոխպատուաստում: «Աստղիկ» բժշկական կեդրոնին մէջ վիրահատած են 56 տարեկան կնոջ մը, որուն համար տոնոր հանդիսացած է 20-ամեայ դուստրը: Հայ մասնագէտներուն վիրահատութիւնն իրականացնելու համար օգնած են Մոսկուայի Բուռնազեանի անուան պետական գիտական կեդրոնի բժիշկները:
«Լեարդի փոխպատուաստումն ամենաբարդ վիրահատութիւններէն մէկն է, այն աւելի բարդ վիրահատական միջամտութիւն կը համարուի, քան սրտի փոխպատուաստումը: Հայ մասնագէտներուն հետ 2 տարի է, որ կը համագործակցինք, վերապատրաստումներ կ’իրականացնենք, որպէսզի Հայաստանի մէջ ալ նման վիրահատութիւններ ըլլան»,–ըսաւ Ոսկանեան:
Անոր խօսքով` լեարդն եզակի օրկան է, եւ 1 լեարդէն հնարաւոր է «ստանալ» երկուքը: Այսինքն` ըստ մասնագէտին, թէ՛ փոխպատուաստուողին, թէ՛ տոնորին մօտ 1 ամսուան ընթացքին լեարդի երկրորդ հատուածը կը սկսի վերականգնուիլ ու անհրաժեշտ բոլոր գործերը կատարել:
Ինչ կը վերաբերի տոնոր դառնալու հետ կապուած հնարաւոր վտանգներուն, ապա, Ոսկանեանի հաւաստմամբ, եթէ ոեւէ մէկուն մօտ ինչ-որ վտանգաւոր հարցեր կան , ապա այդ մարդն ուղղակի տոնոր չի կրնար դառնալ: «Ի դէպ, փոխպատուաստուած լեարդը կրնայ ծառայել մինչեւ կեանքի վերջ: Ըստ վիճակագրութեան` փոխպատուաստուած հիւանդներու 90 տոկոսը 5 տարի անց դեռ ողջ եղած է»,–ըսաւ բժիշկը:
«Աստղիկ» բժշկական կեդրոնի տնօրէն Ասատուր Ասատրեանն ալ նշեց, որ վիրահատութիւնը տեւած է 8 ժամ, որ համաշխարհային փորձի մէջ լաւ ցուցանիշ կը համարուի: «Վիրահատութիւնը կատարուած է միաժամանակ եւ՛ մօր, եւ՛ դստեր մօտ, սակայն տարբեր հիւանդասենեակներու մէջ:
Բժիշկներու ամբողջ խումբ մը աշխատած է,–ըսաւ ան:Բժիշկը տեղեկացուց նաեւ, որ կինը 3 տարի իրենց բժիշկներու հսկողութեան ներքոյ եղած է, եւ անոր մօտ Հեպատիտ C էր` լեարդի խանգար: Ըստ անոր` եթէ կնոջ չվիրահատէին, անոր կեանքի տեւողութիւնը շատ կարճ պիտի ըլլար:
ՀՀ առողջապահութեան նախարար Արսէն Թորոսեանի խօսքով ալ` լեարդի փոխպատուաստման եւս քանի մը վիրահատութիւն անվճար կ’ըլլայ, իսկ այդ ընթացքին կը փորձեն հասկնալ` յաջորդ տարուընէ սկսած ինչպէս ատոնք պիտի իրականացուին: «Յաջորդ տարուան մէջ պիւտճէն կազմելուն` այս վիրահատութիւնն ալ պէտք նկատի ունենանք: Կ’ըլլան հիւանդներ, որոնց վիրահատութեան գումարէն մաս մը պետութիւնը կը վճարէ, կ’ըլլան հիւանդներ ալ, որոնք իրենք կը վճարեն անհրաժեշտ գումարը: Սակայն դեռ չենք կրնար որեւէ գումարի մասին խօսիլ, քանի որ չենք գիտեր` վիրահատութեան ինքնարժէքն որքան կ’ըլլայ: Ի դէպ, սա բաւական թանկ վիրահատութիւն է, եւ Պելառուսիոյ մէջ, օրինակ, այն 130 000 տոլար արժէ»,–ըսաւ Թորոսեան:
Ի դէպ, լեարդի փոխպատուաստման վիրահատութիւնները դեռ ռուս գործընկերներուն հետ համատեղ կ’իրականացուին` մինչեւ հայ մասնագէտներն աւելի հմտանան այդ հարցով: Յառաջիկային «Աստղիկ» ԲԿ–ին կը միանան նաեւ այլ հիւանդանոցներ` կատարելով լեարդի փոխպատուաստում: