ԵՐԵՎԱՆ, 24 ապրիլի — Sputnik. ՀՀ երկրորդ նախագահ Ռոբերտ Քոչարյանի պաշտպանների 3 դիմումներից 2-ը Սահմանադրական դատարանը մերժել է վարույթ ընդունել։ Այս մասին այսօր լրագրողներին հայտնեց ՍԴ նախագահ Հրայր Թովմասյանը։
«Սահմանադրական դատարանի մասին օրենքով դրանք ընդդատյա չեն եղել Սահմանադրական դատարանին կամ սպառած չեն եղել արդարադատության բոլոր միջոցները»,– ասաց Թովմասյանը։
Ինչ վերաբերում է Քոչարյանի նկատմամբ հարուցված քրեական գործով քաղաքական ճնշումների մասին պաշտպանների հայտարարություններին, Հրայր Թովմասյանը չցանկացավ մեկնաբանել դրանք, իսկ իր նկատմամբ ճնշման առկայության մասին հարցին պատասխանեց. «Ոչ, երբեք, ցանկացած ճնշման դեպքում դուք դրա մասին կիմանաք»։
Հիշեցնենք` Ռոբերտ Քոչարյանի փաստաբաններն առաջին դիմումը ՍԴ ներկայացրել էին հունվարի 8-ին, երկրորդը` հունվարի 18-ին, երրորդը` փետրվարի 14-ին։ Երրորդ դիմումն ընդունվել է ՍԴ վարույթ։ Նշանակվել է գրավոր դատաքննություն, որը մեկնարկել է ապրիլի 9-ին։