ԵՐԵՎԱՆ, 22 ապրիլի – Sputnik. Հայկական կողմը պետք է հասնի Արցախի հարցով ձեռնտու բանաձևերի ընդունմանը, բայց հակամարտության կարգավորման հարցում դրանք առանցքային դերակատարություն չեն ունենա։
Այս մասին Sputnik Արմենիային ասաց Հայաստանի պաշտպանության նախկին նախարար Վաղարշակ Հարությունյանը։
Նրա խոսքով՝ իրական բանակցությունները փաստացի ընդհատվել են 2016 թվականի ապրիլին։ Դրանից հետո լիարժեք բանակցությունների մասին խոսք չկա։
«Կարելի է ասել , որ 2016-ի ապրիլից հետո բանակցություններ ընդհանրապես չեն եղել։ Բանակցությունները սկսելու մասին բանակցություններ են եղել», - ասաց Հարությունյանը։
Հայկական կողմը հենց այնպես չէր պնդում, որ միջադեպերի հետաքննման մեխանիզմներ ներդրվեն․ հայկական կողմին պետք չէ հարձակվել, պետք չէ պատերազմ, նա ընդգծեց, որ Հայաստանն իր հարցերը լուծել է։
Մեկնաբանելով հրադադարի ռեժիմի խախտմանը միջազգային հանրության արձագանքը՝ Հարությունյանը նշեց, որ այն միշտ չէ, որ օբյեկտիվ է ու դրան պետք է հանգիստ վերաբերվել։
Նա ուշադրությունը հրավիրեց այն հանգամանքին, որ ՄԱԿ-ի Անվտանգության խորհուրդը բանաձևեր է ընդունել, որոնք չեն համապատասխանել հայկական կողմի շահերին, բայց դրանք անվերապահորեն չեն ընդունվել։
«Եթե հանկարծ վաղը որոշում կայացնեն, որ Արցախը պետք է հանձնել, կհանձնե՞նք։ Իհարկե ոչ», - ասաց Հարությունյանը։
Նա ավելացրեց, որ պետք է լոբբիստական աշխատանքներ անցկացնել միջազգային հարթակներում, սակայն միշտ չէ, որ ընդունված բանաձևերը հայկական կողմի շահերից են բխելու․ Ադրբեջանը նույնպես քնած չէ։
Ինչ վերաբերում է բանակցություններին, ապա դրանց մասնակցելու պատրաստակամությունը ենթադրում է նաև փոխզիջումների գնալու պատրաստակամություն։
«Զիջումները կարող են լինել միայն այն շրջանակում, որը չի վնասում գլխավոր նպատակին՝ Արցախի կարգավիճակին։ Եթե բանակցությունների միջոցով չի կարելի Արցախի անկախության հասնել, ապա դրանք անիմաստ են դառնում», - նշեց Հարությունյանը։
Ինչ վերաբերում է համանախագահ երկրներին՝ նրանք միանշանակ ոչ ոքի կողմից չեն լինելու, հակառակ դեպքում նրանք կդադարեն միջնորդ լինել։
Ավելին, նրա խոսքով, համանախագահ երկրների շահերը տարածաշրջանում չեն համընկնում։ Երբ խոսում են ղարաբաղյան խնդրին ընդհանուր մոտեցման մասին, ապա ենթադրում են ոչ թե խնդրի լուծման մեկ սցենար, այլ որ կարգավորումը դեռ հեռու է։
«Ո՛չ ԱՄՆ-ն, ո՛չ Ռուսաստանը չեն կարող լուծել հակամարտությունը՝ հաշվի առնելով սեփական շահերը։ Չնայած, որ Մոսկվան ավելի շատ է շահագրգռված ու տարածաշրջանին ավելի մոտ է», - ասաց Հարությունյանը։
Այս փուլում կողմերը դժվարությամբ, բայց հասել են պայմանավորվածության՝ վստահություն հաստատելուն ուղղված միջոցների իրականացման վերաբերյալ։
Ամփոփելով՝ Հարությունյանը հիշեցրեց, որ ավելի վաղ ադրբեջանական կողմը բազմիցս հրաժարվել է ձեռք բերված պայմանավորվածություններից՝ սկսած 1994 թվականին հրադադարի ստորագրման պահից։