ԵՐԵՎԱՆ, 21 ապրիլի — Sputnik. Շրի Լանկայում յոթերորդ ու ութերորդ պայթյուններն են որոտացել։ Այս մասին հայտնում է ՌԻԱ Նովոստին՝ հղում անելով տեղական ԶԼՄ-ներին։
Յոթերորդ պայթյունը որոտացել է Կոլոմբոյի Tropical Inn հյուրանոցում, որը գտնվում է մայրաքաղաքի կենդանաբանական այգու մոտ է։ Պայթյունի հետևանքով երկու մարդ է մահացել, մի քանիսը տուժել են։
Ութերորդ ահաբեկչությունը տեղի է ունեցել Կոլոմբո ավանի բնակելի համալիրում։
Դեպքերի վայրում անվտանգության ուժերի աշխատակիցներ են աշխատում, կենդանաբանական այգին ժամանակավոր փակ է։
Կասկածներ կան, որ առնվազն երկու պայթյունը մահապարտներն են իրականացրել։ Երկրում արտակարգ իրավիճակ է հայտարարվել, երեկոյան ժամը 18-ից պարեկային ժամ է հայտարարվել։
Sputnik Արմենիան արդեն տեղեկացրել է, որ ևս վեց պայթյուն էլ որոտացել էին ապրիլի 21-ին Զատիկի տոնակատարության ժամանակ Shangri-La, Cinnamon Grand ու Kingsbury հինգաստղանի հյուրանոցներում Կոլոմբոյում ու Կոտահենա, Նեգոմբո ու Բատիկալոա քաղաքների եկեղեցիներում։
Հյուրանոցներում ու եկեղեցիներում մահացածների թիվը հասել է 185-ի, նրանց շարքում 35-ը օտարերկրացի են: Ավելի քան 500 մարդ վնասվածք է ստացել։
Ռումբերը գրեթե միաժամանակ պայթել են երեք հյուրանոցներում ու երեք եկեղեցիներում։ Ծայրահեղական խմբավորումներից ոչ մեկը դեռ չի ստանձնել տեղի ունեցածի պատասխանատվությունը, բայց արդեն հայտնի է, որ դա ծրագրած ահաբեկչական հարձակում է եղել։
Պայթյունների վայրերում աշխատում է ոստիկանությունը։ Կոլոմբոյի միջազգային օդանավակայանում անվտանգության միջոցներն ուժեղացված են։