ԵՐԵՎԱՆ, 17 ապրիլի — Sputnik. «Գազպրոմ Արմենիայի» հազարավոր աշխատակիցների կրճատման մասին խոսք չկա, այսօր ԱԺ–ում կառավարական ժամի ընթացքում հայտարարեց փոխվարչապետ Մհեր Գրիգորյանը` պատասխանելով ընկերությունում առաջիկա օպտիմալացման մասին գյումրեցի պատգամավոր Սարիկ Մինասյանի հարցին։
«Չեմ կարծում, որ խոսքը «Գազպրոմ Արմենիայում» զանգվածային կրճատումների մասին է։ Աշխատանքի օպտիմալացում, եթե նույնիսկ լինի, ապա պետք է լինի կառավարման համակարգի զարգացման հաշվին», – ասաց Գրիգորյանը։
Եթե տեսուչների մասին խոսենք, ապա հնարավոր է, որ այսօրվա թվով տեսուչների կարիք չլինի, քանի որ փոխվել են հաշվիչների տեսակները։ Տեխնոլոգիական զարգացման պայմաններում, ըստ նրա, կրճատումները տրամաբանական են։
Միևնույն ժամանակ նա համոզմունք հայտնեց, որ սպասվող հազարավոր կրճատումների վերաբերյալ մամուլում տեղ գտած հրապարակումները իրականությանը չեն համապատասխանում։
Պատգամավորներից մեկի` կրճատումները կանխելու քայլեր ձեռնարկելու խնդրանքին, Գրիգորյանը նշեց, որ իշխանությունների գործողությունները պետք է խելամտության շրջանակում լինեն և չպետք է բերեն գազի սակագնի բարձրացման։
Ավելի վաղ մամուլում տեղեկություն էր հայտնվել, որ սպառողների համար գազի ներկայիս սակագինը պահպանելու համար «Գազպրոմ Արմենիայի» տեսուչներից շատերը աշխատանքից ազատման ծանուցում կստանան։