ԵՐԵՎԱՆ, 14 ապրիլի — Sputnik. Կտրած-ծակած վերքերով «Գյումրու մոր և մանկան ավստրիական հիվանդանոց» տեղափոխած դպրոցականներից 2 դուրս են գրվել։
Գյումրիում ապրիլ 12-ին երեկոյան, ժամը 22:00- ի սահմաններում ավստրիական մանկական հիվանդանոց են տեղափոխվել 3 դպրոցական՝ 16-ամյա Նարեկ Մ., 16-ամյա Վահագն Ա. և 18-ամյա Վահան Ղ.: Ինչպես Sputnik Արմենիային տեղեկացրեց հիվանդանոցի տնօրեն Աշոտ Կուրղինյանը, Նարեկը և Վահագն անհրաժեշտ բուժօգնություն ստանալուց հետո դուրս են գրվել հիվանդանոցից: «Վահան Ղ. շարունակում է մնալ բժիշկների հսկողության տակ, նրա վիճակը գնահատվում է միջին ծանրության՝ բարելավման միտումով»,-նշեց Աշոտ Կուրղինյանը:
Ըստ տեղեկությունների` դպրոցականները նույն թաղամասից են: Նրանք վիճել են, իսկ վեճն ավարտվել է դանակահարությամբ: Գործը քննվում է ՀՀ ոստիկանության Մուշի բաժնում: Կատարվում են քննչական գործողություններ դեպքի հանգամանքները պարզելու ուղղությամբ: