ԵՐԵՎԱՆ, 13 ապրիլի - Sputnik. Արցախում կթխեն աշխարհի ամենաերկար ժենգյալով հացը, որը կարող է հայտնվել Գինեսի ռեկորդների գրքում։ Այսօր լրագրողների հետ զրույցում այս մասին ասաց ամենամյա փառատոնի կազմակերպիչ, «Էկոտուրիզմը Արցախում» նախաձեռնության առաջնորդ Սամվել Միրզախանյանը։
Միջոցառումը կկայանա «Հզոր Հաթերք» ծրագրի շրջանակում անցկացվող ժենգյալի հացի երկրորդ փառատոնի ժամանակ։ Այս տարվա փառատոնը կկազմակերպվի մայիսի 11-ին Հաթերք գյուղում։
«Ռեկորդային ժենգյալով հացը, որի երկարությունը կլինի 2 մետր 90 սանտիմետր, կպատրաստեն փորձառու խոհարարները։ Մեր ժենգյալով հացը Գինեսի ռեկորդների գրքում հայտնվելու բոլոր հնարավորություններն ունի։ Դրա համար նույնիսկ հատուկ սպասք է պատրաստվել»,- ասաց Միրզախանյանը։
Նշենք, որ անցած տարվա դեկտեմբերին Հադրութում 3 մետրանոց ժենգյալով հաց էր թխվել, որը գրանցվել էր Հայաստանի «Դյուցազնագրքում»։ Այս տարվա ժենգյալով հացը կթխեն հենց նույն մարդիկ։
Կազմակերպիչներն ակնկալում են, որ փառատոնին 15 հազար մարդ կայցելի։ Ակտիվ հանգստի սիրահարների համար ջիփ-տուրեր կկազմակերպվեն։
Միրզախանյանն ընդգծեց, որ Երևանից Հաթերք և հակառակ ուղղությամբ հատուկ տրանսպորտ կգործի։ Փառատոնը կմեկնարկի առավոտյան ժամը 12։00-ին։
Նա ընդգծեց, որ միությունն ունի փառատոնը պատշաճ մակարդակով կազմակերպելու բոլոր հնարավորությունները։ Սա մեծ քայլ կլինի հայկական մշակութային ժառանգության պահպանման գործում։
Հաթերք համայնքն ունի 2500 բնակիչ, երկու մանկապարտեզ, գյուղում երկու հյուրատուն է գործում։