ԵՐԵՎԱՆ, 10 ապրիլի — Sputnik. Ռուսական հեռուստաալիքների հեռարձակումը սահմանափակելու հարցում Ուկրաինայի, Մոլդովայի և Վրաստանի օրինակը Հայաստանին պետք չէ. պատասխանելով «Իմ քայլը» դաշինքի պատգամավոր Նարինե Թուխիկյանի հարցին` ասաց Հեռուստատեսության և ռադիոյի ազգային հանձնաժողովի նախագահ Տիգրան Հակոբյանը։
ԱԺ գիտության, կրթության, մշակույթի, սփյուռքի, երիտասարդության և սպորտի հարցերով հանձնաժողովում քննարկման ժամանակ Թուխիկյանը բարձրացրեց «Мир», «Россия», «ОРТ» ալիքների որոշ հաղորդումների հեռարձակումը սահմանափակելու հարցը, որոնք ըստ նրա, հակահայկական բովանդակություն ունեն։ Նա հարցրել է Հակոբյանին, թե «արդյո՞ք հակահայկական, հայերի նկատմամբ թշնամանք առաջացնող կամ հրահրող այդ հաղորդումները, Հայաստանը որքան էլ պայմանագրեր ունի իրենց հետ, կարող է սահմանափակել կամ անջատել այդ հաղորդումների հեռարձակման պահերը»։
Ի պատասխան Հեռուստատեսության և ռադիոյի ազգային հանձնաժողովի նախագահ Տիգրան Հակոբյանը, պարզաբանեց, որ դա զուտ քաղաքական հարց է, որին պետք է շատ զգույշ վերաբերվել։
«Միջազգայինը մեծագույն խնդիր է։ Մենք պատրաստ ենք, մենք բացեր տեսնում ենք օրենսդրության մեջ։ Բայց սա լիովին քաղաքական խնդիր է։ Մեզ հարց տալիս են. բա տեսեք Ուկրաինան, Մոլդովան, Վրաստանը դա արեցին։ Հա, ասում ենք, իհարկե։ Մենք պետք է հասկանանք դրա գինը», – ասաց Հակոբյանը։
Նրա խոսքով` և՛ Ուկրաինան, և՛ Մոլդովան, և՛ Վրաստանը զրկվեցին տարածքներից։
«Այդ օրինակները մեզ թող չբերեն», – նշել է Հակոբյանը։
Հակոբյանի կարծիքով, լուրջ խնդիրներ կան, և հավանաբար ստատուս–քվոն պահպանելը (նկատի ունի այդ ծրագրերի հեռարձակումը)` «չարյաց փոքրագույնն է»։
Այդ մասին խոսելը դեռ դժվար է, գուցե, ըստ նրա, դեռ ժամանակ կգա։ Դեռ սա առաջնահերթ խնդիր չէ։
Թեև այն հարցում, որ դրանք որոշակի վտանգ են ներկայացնում երկրում տեղեկատվական անվտանգության համար, Հակոբյանը համաձայն է Թուխիկյանի հետ։ Միևնույն ժամանակ նա նշեց, քանի որ սա քաղաքական հարց է, այստեղ պետք է շատ զգույշ գործել։