ԵՐԵՎԱՆ, 3 ապրիլի — Sputnik. Խորհրդային Միության փլուզումից հետո Հայաստանը կարողացել է պահպանել ՏՏ ոլորտի իր մասնագետներին, ինչը շատ կարևոր է համագործակցության համար։ Sputnik Արմենիա մամուլի կենտրոնում կայացած ասուլիսի ժամանակ այս մասին ասաց Համակարգչային և տեղեկատվական տեխնոլոգիաների (ՀՏՏՁ) ձեռնարկությունների ասոցիացիայի գործադիր տնօրեն Նիկոլայ Կոմլևը։
Նշենք, որ ՀՏՏՁ համաժողովն արդեն երկրորդ անգամ է անցկացվում Երևանում (առաջին անգամ` 2015 թվականին)։ Միջոցառմանը կմասնակցեն Ռուսաստանի տարբեր քաղաքների ընկերություններ, այդ թվում Կազանից, որը ԽՍՀՄ–ում էլեկտրոնային հաշվիչ մեքենաների նախագծման կենտրոններից մեկն էր։
«Ռուսաստանում նախկին, խորհրդային կենտրոններից, բարեբախտաբար, մասնագետներ են մնացել, դպրոց է մնացել։ Ուրախ ենք, որ զարգացումը պահպանվել է նաև Հայաստանում։ Այդ պատճառով էլ հայկական ընկերությունները կարող են մեր հեռանկարային գործընկերները դառնալ», – ավելացրեց նա։
Կադրերի, երիտասարդ մասնագետների հարցն արդիական է Ռուսաստանում, այդ թվում` մարզերում։ Ռուս մասնագետների համար ավանդական ճանապարհը (մարզերից` Մոսկվա, Մոսկվայից` արտերկիր) այսօր ուզում են փոխարինել ուրիշով. երիտասարդներին ուզում են ցույց տալ, թե ինչպես կարելի է սեփական գիտելիքով փոխել կյանքը հարազատ քաղաքում և մարզերում, ձեռնարկություններում, որտեղ աշխատում են իրենց ծնողներն ու հարազատները։
«Հայաստանի իրավազորություն» հիմնադրամի ղեկավար Աշոտ Ասլանյանը նշեց, որ երկրի առավելություններից մեկը նախևառաջ կարող են լինել մարդիկ։ Այստեղ նրանք բարյացակամ են հյուրերի նկատմամբ, խոսում են տարբեր լեզուներով և ուսման են ձգտում։
«Հայաստանում հաջող նախագծեր կան, այդ թվում` ծրագրավորման ոլորտում։ Վերջին տարիների ընթացքում նրանք ավելի են զարգանում։ Դա և՛ «Թումո» կենտրոնն է, և՛ «Արմաթ» ինժեներական լաբորատորիաները», – նշեց նա։
Նշենք, որ գագաթնաժողովին կժամանեն մասնագետներ Ռուսաստանից, ԱՄՆ–ից, ԵՄ–ից, Ճապոնիայից, ինչպես նաև Հայաստանից։