ԵՐԵՎԱՆ, 23 մարտի – Sputnik. Սեքս–սկանդալի ֆոնին Հռոմի Ֆրանցիսկոս պապը ընդունել է կարդինալ, Սանտյագոյի արքեպիսկոպոս և Չիլիի կաթոլիկ եկեղեցու հոգևորականության առաջին ներկայացուցիչ Ռիկարդո Էզատիի հրաժարականը։ Այս մասին հայտնում է ՌԻԱ Նովոստին` հղում անելով Վատիկանի մամուլի ծառայությանը։
Նշվում է, որ Սանտյագոյի թեմի ղեկավարի պարտականությունները ժամանակավորապես կկատարի Կոպիապո քաղաքի եպիսկոպոս Սելեստինո Աոս Բրակոն։
Էզատին հայրենիքում մեղադրվում է անչափահասների նկատմամբ սեռական հանցագործությունները քողարկելու մեջ, նրա անունը կապվում է նաև չիլիացի ազդեցիկ հոգևորական Ֆերնանդո Կարադիմայի գործի հետ, ըստ որի` եկեղեցականը
մեղավոր է ճանաչվել մանկապղծության մեջ և զրկվել հոգևոր աստիճանից։
Հռոմի պապի ծայրահեղ քայլը կապված է Չիլիի կաթոլիկ եկեղեցու հետ կապված աղմկահարույց պատմության հետ. գրեթե 80 եկեղեցականի մեղադրում են երեխաների նկատմամբ ոտնձգություններ կատարելու մեջ։ Հոկտեմբերին Պապը կարգալույծ էր արել նաև 2 եպիսկոպոսի, որոնք ավելի վաղ մեղադրվել էին անչափահասների նկատմամբ սեռական բռնություն գործադրելու մեջ։ Հունիսին նա ընդունել էր չիլիացի 3 եպիսկոպոսի հրաժարականը։