ԵՐԵՎԱՆ, 20 մարտի — Sputnik, Արմենուհի Մխոյան. Սամվել Բալասանյանը Նիկոլ Փաշինյանից հեռախոսազանգ է ստացել այսօր առավոտյան։
Այս մասին Գյումրու քաղաքապետն ասաց լրագրողների հետ ունեցած ասուլիսի ժամանակ:
Հիշեցնենք, որ երեկ` մարտի 19-ին, ՀՀ վարչապետ Նիկոլ Փաշինյանի հրավիրած ասուլիսի ժամանակ լրագրողներից մեկի կողմից հարց էր հնչել Գյումրիում փողոցաշինության ու անօթևանության հանձնաժողովի աշխատանքի վերաբերյալ: Վարչապետը խոստացել է կապնվել Գյումրու քաղաքապետի հետ։
Սամվել Բալասանյանը նշեց՝ վարչապետին ներկայացրել է իրավիճակը. «Փողոցաշինական աշխատանքները մեկնարկել են: Բնական է` շինարարության ժամանակ կլինեն անհանգստություններ, բայց դա ժամանակավոր է»,-նշեց Սամվել Բալասանյանը գյումրեցիներին համբերատարություն, իսկ լրագրողներին էլ օբյեկտիվություն մաղթելով: Նշենք, որ ընտրված 34 փողոցները նորոգվելու են հիմնովին, սակայն, նախորդ անհանգստությունը բացառելու համար, այս անգամ քանդելու են ոչ թե մայթերն ու փողոցները միաժամանակ, այլ` նախ մայթերը, ապա փողոցները: Ի դեպ, փողոցները հիմնականում կենտրոնական են: «Մինչ այս, երբեք նման աշխատանքներ նման ծավալով չեն կատարվել: Ոչ մի խնդիր չունենք՝ փողը կա, նախագծերը կան, շինարարները կան, ժամկետները տրված են: Բոլոր շինարարական ընկերություններն արդեն սկսել են աշխատանքները: Սա 3 տարվա ծրագիր է, իսկ փողոցների վերանորոգումից հետո քաղաքում շուրջ 11 հազար 500 լուսանցույց է տեղադրվելու»: Քաղաքապետը վստահեցնում է`ցեխից ու փոշուց ազատվելու լավագույն տարբերակը համբերելն է:
Խոսելով անօթևանության հանձնաժողովի մասին` քաղաքապետը նշեց, որ հանձնաժողովը վարչապետին տվյալները ներկայացնելու է հունիսի 30-ին, սակայն մինչ այդ Գյումրու քաղաքապետարանն արդեն ունի իր տվյալները. այս պահին Գյումրիում կա 2805 տնակ, դրանցից 451 չբնակեցված են, 410–ը` քարաշեն, իսկ 321–ը` կիսաքարաշեն: «Մենք էլ քաղաքապետարանում մեր ներքին հանձնաժողովն ենք ստեղծել, որը աշխատում է ամեն օր, իսկ տնակներում բնակվողների կոնկրետ թիվը ճշտելու համար դիմել ենք էլեկտրական ցանցերին»,-նշեց քաղաքապետը:
Հանդիպման ժամանակ քաղաքապետը նաև անդրադարձավ ներդրումային ծրագրերին` ցավով նշելով, որ նախկին վարչապետի՝ Կ. Կարապետյանի Գյումրու Ռուսթավելի փողոցի վերականգման ժամանակ Գյումրիում ներդրումների պատրաստակամություն հայտնած որոշ գործարարներ, «հետ են քաշվել»: Նոր ներդրողներ կան, բայց ամեն դեպքում, դա դեռ այն ներդրումային հոսքը չէ, ինչը սպասում է քաղաքապետը: Հավելենք`Կարեն Կարապետյանի գնած ռեստորանային համալիրը շահագործման կհանձնվի շուտով: