ԵՐԵՎԱՆ, 19 մարտի — Sputnik. Հայաստան– Իրան գազատարի շուրջ քննարկումները շարունակվում են ու կշարունակվեն։ Այս մասին այսօր հրավիրված ասուլիսում հայտարարեց ՀՀ վարչապետ Նիկոլ Փաշինյանը` պատասխանելով Իրանում ձեռք բերված պայմանավորվածությունների, մասնավորապես` նոր գազատարի կառուցման մասին հարցին։
«Խոսքը նոր գազատարի մասին չի լինի առնվազն այնքան ժամանակ, քանի դեռ եղած գազատարներով հնարավոր է իրականացնել եղած ծրագրերը»,–ասաց Փաշինյանը` հավելելով, որ Իրան մեկնելուց առաջ հեռախոսազրույցներ է ունեցել Վրաստանի, ՌԴ–ի, Թուրքմենստանի նախագահների հետ, քանի որ կարևոր է համարել պարզել նրանց հետաքրքրությունն այդ ծրագրի վերաբերյալ։
«Այդ քննարկումները կշարունակվեն, քանի դեռ մենք չենք եկել ընդհանուր եզրակացության` դրական, թե բացասական»,– ասաց Փաշինյանը։
Նա նաև նշեց, որ Հայաստանն այսօր փորձում է հարաբերությունները զարգացնել միաժամանակ և՛ Իրանի, և՛ ՌԴ–ի, և՛ ԵՄ–ի, և՛ ԱՄՆ–ի հետ։ Այդ հարաբերությունները, Փաշինյանի խոսքով, կարևոր են տարածաշրջանում կայունությունն ու խաղաղությունն ապահովելու համար։