ԵՐԵՎԱՆ, 17 մարտի — Sputnik. Հայաստանը ներկայացնող բռնցքամարտիկ Անուշ Գրիգորյանը դարձել է Եվրոպայի չեմպիոն։
Ինչպես հաղորդում է Հայաստանի բռնցքամարտի ֆեդերացիայի մամուլի ծառայությունը, Անուշ Գրիգորյանը դուրս էր եկել Վլադիկավկազում ընթացող բռնցքամարտի Եվրոպայի 18-22 տարեկանների առաջնության եզրափակիչ:
51 կգ քաշային Անուշն այսօր կայացած եզրափակիչ մրցավեճում հաղթել է ռուս բռնցքամարտիկին և նվաճել չեմպիոնի կոչումը:
Հիշեցնենք, որ կիսաեզրափակչում Անուշ Գրիգորյանը հաղթել էր Իտալիայի ներկայացուցչին:
Հայաստանի հավաքականը նաև արծաթե մեդալ ունի։ 64 կգ քաշային Անի Հովսեփյանը եզրափակչում պարտվեց Ռուսաստանի ներկայացուցչին և դարձավ արծաթե մեդալակիր:
Վլադիկավկազում, բացի Անուշ Գրիգորյանից ու Անի Հովսեփյանից, պատվո պատվանդանին կանգնեցին Հայաստանը ներկայացնող ևս երեք բռնցքամարտիկ: Տղաների մրցաշարի բրոնզե մեդալակիր դարձան 60 կգ քաշային Հրայր Շահվերդյանը, 75 կգ քաշային Վախթանգ Հարությունյանը և գերծանր քաշային Գուրգեն Հովհաննիսյանը: Ավելացնենք, որ մեդալների նման հավաքածու Հայաստանը հավաքականը նախկինում երբեք չեր նվաճել՝ 1 ոսկե, 1 արծաթե և 3 բրոնզե մեդալ:
Այսպիսով, Հայաստանի հավաքականը հայրենիք կվերադառնա 5 մեդալով: