ԵՐԵՎԱՆ, 15 մարտի — Sputnik. Երևանի թիվ 198 ավագ դպրոցում ռուսաց լեզվի ինտերակտիվ դասարան է բացվել։ Այս մասին տեղեկացնում է Հայաստանում Ռուսաստանի դեսպանատունը։
Հայաստանում Ռուսաստանի արտակարգ և լիազոր դեսպան Սերգեյ Կոպիրկինը նույնպես մասնակցել է ռուսերենի դասարանի բացմանը:
Դպրոցի տնօրեն Արտաշես Թորոսյանը շնորհակալություն է հայտնել դեսպանատանը և Ռուսաստանի գիտության և մշակույթի կենտրոնին` տեխնոլոգիական կրթական սարքավորումներ տրամադրելու համար։ «Այդ սարքավորումները կօգտագործենք ինչպես դասերի, այնպես էլ Ռուսաստանում գործընկեր դպրոցների հետ վեբինարներ կազմակերպելու համար»,–ասել է Թորոսյանը։
Նշենք, որ նոր ուսումնական սենյակի համար ձեռք է բերվել ժամանակակից ունիվերսալ ինտերակտիվ պրոյեկտոր, որը կարելի է օգտագործվել ցանկացած մակերեսի վրա:
Կոպիրկինը, շնորհավորելով դպրոցի աշխատակիցներին ժամանակակից լսարանի բացման կապակցությամբ, նշել է, որ այս իրադարձությունը կարելի է համարել մեր երկրների միջև պատմականորեն հաստատված սերտ կապերի նոր արտահայտություն: «Համոզված եմ, որ այս կենտրոնը կարևոր ներդրում կլինի դպրոցի գործունեության մեջ, և թույլ կտա իրականացնել ուսումնառության գործընթացը նոր մակարդակի վրա, ինչը այսօրվա դինամիկ աշխարհի պահանջն է։ Բացի այդ` հույս ունեմ, որ այն կօգնի դպրոցին դառնալու Երևանի առաջատար դպրոցներից մեկը»,–ասել է Կոպիրկինը։
Նա կարևորել է հայ երիտասարդության կողմից ռուսաց լեզվի ուսումնասիրությունը։ Դեսպանի խոսքով` ռուսերենի ուսումնասիրումը թույլ կտա ոչ միայն ընդլայնելու մասնագիտական հեռանկարները, այլև կնպաստի անձնական զարգացմանը: