ԵՐԵՎԱՆ, 14 մարտի — Sputnik. Հասկանալի չէ, թե ինչու ենք ստեղծում պետական նոր ընկերություն, եթե կան նախարարություններ։ Կառավարության այսօրվա նիստում այս մասին ասաց վարչապետ Նիկոլ Փաշինյանը։
Գյուղատնտեսության նախարարությունը կառավարության քննարկմանն է ներկայացրել «Հայաստանի Հանրապետության գյուղատնտեսության նախարարության «Գյուղական տարածքների տնտեսական զարգացման ծրագրերի իրականացման գրասենյակ» պետական հիմնարկի գործունեությունը դադարեցնելու մասին նախագիծը։ Այդ գրասենյակի փոխարեն առաջարկում են բացել պետական ՓԲԸ։
Գրասենյակը սպասարկում է Գյուղատնտեսության զարգացման միջազգային հիմնադրամի վարկային ծրագիրը և վարկային միջոցներ ուղղորդում գյուղացիներին։ Միջոցները փոխանցվում են բանկերի միջոցով, իսկ գրասենյակը հետևում է, թե որ գյուղացիները և ագրոգործարարներն են վարկեր ստանում ու ինչպես են վերադարձնում, բացատրեց գյուղատնտեսության նախարարի պաշտոնակատար Գեղամ Գևորգյանը։
Առաջարկությունը դուր չեկավ ֆինանսների նախարար Ատոմ Ջանջուղազյանին։
«Ինչո՞ւ փակել ԾԻԳ–ը և բացել ՓԲԸ։ Հասկանալի չէ, թե ինչու այդ խնդիրը չի կարող լուծել հենց գյուղատնտեսության նախարարությունը», – հայտարարեց նա։
Նիկոլ Փաշինյանի համար նույնպես անհասկանալի էր, թե ինչու է միջնորդ ստեղծվում դոնորների և բանկերի միջև։
«Այսինքն՝ ԾԻԳ-ը փակում ենք, ՓԲԸ ենք ստեղծո՞ւմ։ Մեր խնդիրն է փող ստանալ դոնորից և փոխանցել գյուղացիներին։ Ինչի՞ համար է միջնորդը։ Ինչո՞ւ միջոցներն անմիջապես չփոխանցել բանկերին։ Օրինակ` Կենտրոնական բանկի միջոցով։ Իսկ եթե այդ ընկերությունը խորհրդատվություններ է տալիս ֆերմերներին, ինչո՞ւ դա չի կարող անել հենց գյուղատնտեսության նախարարությունը։ Ի վերջո, ինչո՞ւ ստեղծել ևս մեկ կազմակերպություն», – ասաց նա։
Հարցը դեռ կքննարկվի նաև առաջիկա շաբաթներին։
Նշենք, որ 2019թ–ին կառավարությունը ցանկանում է շարունակել պետապարատի կրճատումը։ Մասնավորապես, կկրճատվի նախարարությունների և դրանց մեջ մտնող գերատեսչությունների թիվը։